Qorǵaljyn-Aryqty avtojolyn sý alyp ketti, jol jabyldy
ASTANA. QazAqparat - 23 mamyr kúni sý alyp ketken Qorǵaljyn-Aryqty avtojoly jabyldy, dep habarlaıdy QazAqparat tilshisi Tótenshe jaǵdaılar komıtetine silteme jasap.
Habarlamaǵa sáıkes, keshe saǵat 12:30 shamasynda oblystyq mańyzy bar «Qorǵaljyn-Aryqty» avtojolynyń 38 shaqyrymdaǵy bóligin sý alyp ketken.
«Qatty jeldiń saldarynan tolqyn paıda bolyp, joldyń 100 metrlik bóligin bıiktigi 10-nan 30 santımetrlik sý alǵan. Qutqarýshylardyń kómegimen atalǵan ýchastokta kezekshilik uıymdastyrylyp, qozǵalysqa shekteý qoıyldy. Sonymen birge, qutqarýshylar kelgen ýaqytta avtojoldyń oń jaq shetinde ÝAZ-3962 avtokóliginiń qalyp qalǵany anyqtaldy. Atalǵan jaǵdaı avtokólik ıesiniń qaýipsizdikti elemeýiniń saldarynan tirkelgen. Zardap shekkender joq», - delingen habarlamada.
Saǵat 16:21 kezinde avtokólik sýdan shyǵarylǵan. Jalpy, Tótenshe jaǵdaılar komıtetinen habarlaǵandaı, Qorǵaljyn aýdanynda eldimekenderdi sý alý, adamdardyń zardap shegý jaǵdaıy tirkelmegen.
«Qazirgi ýaqytta Qorǵaljyn aýdandyq jergilikti atqarýshy organ Qorǵaljyn-Aryqty avtojolynyń atalǵan ýchastogyn jabý týraly sheshim qabyldady. Osyǵan baılanysty eki jaqtan da ınertti materıaldar arqyly jol jabylyp, tıisti jol beligleri qoıyldy. Qozǵalys atalǵan baǵyttaǵy basqa jol arqyly jalǵasýda», - delingen habarlamada.
Aıta ketsek, 12 mamyrda da Qorǵaljyn-Aryqty avtojolyn sý shaıyp ketken bolatyn.
