«Qorǵalýǵa quqyǵy bar kýágerdi» tegin zań kómegin alýǵa haqyly adamdar qataryna qosý qajet - depýtat
Bul týraly Májilis depýtattarynyń bastamasymen ózgeris engizilgeli jatqan QR Qylmystyq-protsestik kodeksiniń jańa redaktsııasynda jazylǵan, dep habarlaıdy QazAqparat tilshisi.
«Qorǵalýǵa quqyǵy bar kýániń óz betinshe nemese óziniń týystary nemese senim bildirilgen adamdary arqyly qorǵaýshy shaqyrýǵa quqyǵy bar. Eger qorǵaýshyny qorǵalýǵa quqyǵy bar kýá, onyń týystary nemese senim bildirilgen adamdary shaqyrmasa, qylmystyq qýdalaý organy onyń osy Kodekstiń 67-babynyń úshinshi bóliginde kózdelgen tártippen qatysýyn qamtamasyz etýge mindetti», - delingen Qylmystyq-protsestik kodekstiń jańa redaktsııasynda.
Osyǵan baılanysty tegin zań kómegin alýǵa haqyly adamdar qataryna qorǵalýǵa quqyǵy bar kýálerdi qosý usynylyp otyr.
«Bilikti zań kómegin, onyń ishinde tegin negizde alý quqyǵy Qazaqstan Respýblıkasynyń Konstıtýtsııasymen kepildik berilgen. Tegin zań kómegin alýǵa quqyǵy bar adamdar qataryna qorǵalýǵa quqyǵy bar kýálerdi qosý qajet. Túzetý qorǵalýǵa quqyǵy bar kýániń qorǵaýshyny shaqyrý tártibin reglamentteý maqsatynda usynylady. Praktıkada protsesti júrgizetin organ qorǵaýshyny taǵaıyndaý týraly qaýly shyǵarady jáne ony advokattar alqasyna oryndaýǵa jiberedi. Advokattar alqasy onyń mindetine baılanysty qaýlyny oryndaýǵa májbúr bolady jáne qorǵaýshy retinde qatysý úshin advokatty qorǵaýǵa quqyǵy bar kýáge taǵaıyndaıdy. Alaıda, protsesti júrgizetin organ Qylmystyq-protsestik kodekste osy máseleni retteıtin normanyń bolmaýyna súıene otyryp, advokattyń eńbegine aqy tóleý týraly qaýly shyǵarmaıdy», - dep ózgeriske túsindirme bergen bastama tanytqan depýtattar toby.
Sonymen qatar, depýtattar Qylmystyq kodekske advokattardyń qyzmetine zańsyz aralasyp, kúsh kórsetý arqyly isti burmalaýǵa májbúrlegenderdi jazaǵa tartýdy kózdeıtin norma engizýdi usyndy.
https://www.parlam.kz/kk/mazhilis/post-item/36/16086
