Qorǵa jınalǵan zeınetaqy aktıvteri 1 trln teńgege ulǵaıdy

ASTANA. QazAqparat – Biryńǵaı jınaqtaýshy zeınetaqy qorynyń zeınetaqy aktıvteri jyl basynan beri 1 trln teńgege ulǵaıdy. Bul týraly Úkimet otyrysynda QR Ulttyq banki tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Biryńǵaı jınaqtaýshy zeınetaqy qorynyń zeınetaqy aktıvteri jyl basynan beri 1 trln teńgege nemese 8 paıyzǵa ulǵaıyp, bıylǵy qyrkúıek aıynyń sońynda 14,1 trln teńgeni qurady. Jyl basynan bastap ınvestıtsııalyq kiris kólemi - 742 mlrd teńgeni, zeınetaqy jarnalary – 1 trln 238 mlrd teńgeni, zeınetaqy tólemderi – 197,4 mlrd teńgeni, merziminen buryn alý somasy 858,5 mlrd teńgeni qurap otyr», - dedi Ǵalymjan Pirmatov.

Onyń atap ótýinshe, zeınetaqy aktıvteriniń kiristiligi sońǵy 12 aıda 7,5 paıyz boldy.

«Bul rette zeınetaqy aktıvteriniń 5 jyl ishinde jınaqtalǵan kiristiligi jınaqtalǵan ınflıatsııa 53,7 paıyz bolǵan kezde 55,8 paıyzdy qurady», - dedi ol.