Koreılerdi jaqyn tartyp, baýyryna basqan qazaq halqyna rızamyn - Lavrentıı Kan
Oblystyq «Kore» kárister qaýymdastyǵynyń jetekshisi Lavrentıı Kan basqosýda búginde túrli etnos ókilderi kindik qany tamǵan Qazaqstandy óziniń ekinshi Otany sanaıtynyn tilge tıek etti. «Jol kartasynyń jady. Tarıhı jadyny jańǵyrtýdaǵy jastar» taqyrybymen ótken dóńgelek ústelde osy jaıttar nazardan tys qalmady.
Pedagogıka ǵylymdarynyń kandıdaty, professor, atalǵan qaýymdastyqtyń múshesi Anatolıı Pak qazaqstanǵa qonys tepken ata-babalarynyń tarıhı taǵdyry jaıynda keńinen sóz qozǵady. Jalpy etnostyq ulttarǵa degen qurmettiń belgisindeı Memleket basshysy 1995 jylǵy 1 naýryzda Qazaqstan halqy Assambleıasyn qurý týraly Jarlyǵyn shyǵarǵany belgili. Búginde sol Assambleıa taǵdyry toǵysqan etnostyq ult ókilderiniń aýyzbirshiligin bir shańyraq astynda uıytyp, birligin nyǵaıtý baǵytynda tolaıym tirlikter atqaryp keledi.
Tehnıka ǵylymdarynyń kandıdaty, professor, qaýymdastyq múshesi Ilıa He, belsendi jas Aleksandr Mýn jáne joǵary oqý oryndarynyń oqytýshylary aıasynda sóz aldy. Olar 1939 jylǵy deportatsııa saldarynan Qazaqstanǵa 96 myńnan asa koreı kúshtep kóshirilgenin, kópshiligi Qaraǵandy, Qyzylorda, Taldyqorǵan, Túrkistan oblystaryna qonystanǵanyn aıtty. Bul oraıda jol azabyn kórip jetken koreılerdi sol kezde qazaq halqy keń qushaqpen qarsy alǵany jaıynda sóz qozǵap, rızashylyǵyn bildirdi.
«Qanshama qaıǵy-qasiret pen qýǵyn-súrgindi basynan ótkergen koreılerdiń janyna batqan qıyndyǵyn tereń túsinip, ystyq yqylasyn kórsetken qazaq halqy bizge óte ystyq. Koreılerdi jaqyn tartyp, baýyryna basqan qazaq halqyna rızamyn. Bizdiń urpaqtarymyz qazaq topyraǵynda ósip-ónip, qazaq eli men jerine adal qyzmet etip keledi», - deıdi kárister birlestiginiń basshysy Lavrentıı Kan. Sany az bolǵanymen, koreıler ulttyq bolmysyn saqtap, mádenı ortalyqtary arqyly ózderiniń ult retindegi erekshelikterin qasterleı biletin halyq.
Aýqymdy sharada koreı halqynyń Qazaqstanda qyzmet kórsetken ulttyq ansambli týraly da aıtyldy. Búginde koreılerdiń qazaq elin ózimniń týǵan Otanym dep sanaıtyn bir emes, birneshe urpaǵy ósip-ónýde. Kárister qıyn-qystaý zamanda qazaq halqynyń qushaq jaıa qarsy alǵanyn eshqashan da esten shyǵarmaıtynyn erekshe yqylaspen aıtady.
