Koreıler elordada jańa jyl merekesin qalaı atap ótti
ASTANA. QazAqparat - Astanadaǵy Koreı mádenı ortalyǵy «Solnal» aı kúntizbesi boıynsha jańa jyl merekesin atap ótti, dep habarlaıdy «QazAqparat» HAA tilshisi.
Mereke atalyp ótken ortalyq kórermenderge lyq toldy. Jalpy, qazaqstandyqtardyń koreı mádenıetine degen qyzyǵýshylyǵy erekshe dep atap ótýge bolady. Sebebi, júzdegen adam atalmysh merekeni kórýge, ártúrli mádenı sabaqtar men baǵdarlamaǵa qatysý úshin kelgen.
«Solnal - bul Koreıanyń ulttyq merekesi. Ol qýanysh pen baqyttyń nuryn shashatyn Naýryz meıramy ispetti. Bizdiń dástúrlerimiz óte uqsas - babalardy qurmet tutý, kóktem aldynda keshirimdi bolý sekildi ǵuryptarymyz úndes. Biz osy merekeni ótkizýge bir aı boıy daıyndaldyq. Shynymyzdy aıtsaq, sharamyz úlken qyzyǵýshylyq týdyrady dep oılaǵan joq edik», - dedi «QazAqparat» HAA tilshisimen áńgimelesken ortalyqtyń dırektory Heran Lı.
Koreıdiń jańajyldyq salt-dástúrleri shynymen de qyzyqty. Solnal - aı-kún kúntizbesiniń alǵashqy kúni, Koreıadaǵy mańyzdy merekelerdiń biri. Úsh kún boıy toılanady: jańa jyldyń aldyndaǵy kún, jańa jyl kúni men kelesi kún. Bul otbasylyq mereke bolǵandyqtan, Koreıadaǵy adamdardyń barlyǵy otbasyndaǵy úlkenniń úıine jınalady. Kúni búginge deıin koreıalyqtar mereke kúni ózderiniń dástúrli kostıými - «hanbokty» kıedi.
Mereke babalarǵa qurmet kórsetý - «chharemen» bastalady. Tańerteń otbasy beıitke nemese úıde mehrab (altar) ornatyp, jańa jylda babalarynan qorǵan bolýdy suraıdy. Jańa jyldyń mindetti ǵuryptarynyń taǵy biri - «sebe». Ol dástúr boıynsha kishiler úlkenderge ıilip, olardyń batasy men keńesin alady.
Solnalda ártúrli oıyndar da oınalady: otbasylyq «ıýnnorı» ústel tennısiniń kórkin qyzdyryp, er balalar men olardyń aǵalary nemese ákeleri kókke batpyraýyqtar ushyrady. Al qyz balalar átkenshekte otyryp, qyzyqty akrobatıkalyq nómirler jasaıdy.
Koreıanyń Astanadaǵy mádenı ortalyǵyna kelgen meımandar búgin osy oıyndardyń birqataryn oınaýǵa múmkindik aldy. Astanalyqtar koreılerdiń ulttyq «hanbok» kıimderin kıip kórip, «sebe» ekspress-kýrsynan ótti. Koreıdiń dámdi taǵamdaryn ázirlep, ulttyq jańajyldyq «tokkýk» sorpasynan dám tatty.
