Koreıler assotsıatsııasynyń basshysy: qazaq halqy bizge bolashaqqa degen senim berdi

ASTANA. 20 qazan. QazAqparat - Búgin Qazaqstan koreıleri assotsıatsııasynyń HІІ sezinde sóz sóılegen QR Parlamenti májilisiniń depýtaty, Assotsıatsııa prezıdenti Roman Kım ótken ǵasyrdyń 30-jyldaryndaǵy qasiretti tarıhty umytpaýǵa shaqyrdy.

«Qazaqstandaǵy koreı dıasporasynyń 75 jyldyǵyna oraı biz Almaty oblysynyń Úshtóbe qalasy men Oral qalasynda qazaq halqyna degen syılastyqtyń beligisi retinde eskertkishter ornattyq. Bul bizdiń halqymyzdyń basynan ótken náýbet kezinde qazaq halqynyń kórsetken janashyrlyǵy men qamqorlyǵyna aıtqan alǵysymyz. Qazaq halqy bizge bolashaqqa degen senim berdi. Bizdiń sol jyldardy umytýǵa quqymyz joq. Biz taǵdyr tálkegine túsken kezde qol ushyn bergenderdi eshqashan umytpaýǵa tıispiz!» - dedi R. Kım.

Sezge elimizdiń barlyq óńirlerinen 80-nen astam deleget qatysty. Sondaı-aq, arnaıy qonaq retinde Ózbekstan Respýblıkasynyń koreı mádenı ortalyqtary assotsıatsııasynyń tóraǵasy Vıktor Pak ta keldi.