Koreıanyń ulttyq hory Abaı ánin shyrqady
ASTANA. QazAqparat - Koreıa Respýblıkasynyń ulttyq hory qazaqtyń uly aqyny Abaı Qunanbaıulynyń «Aıttym sálem Qalamqas» ánin qazaq tilinde oryndap, elordalyq kórermenderdi tánti etti, dep habarlaıdy QazAqparat.
Dırıjer Ký Chonnyń jetekshiligimen ártister munan bólek qazaqtyń halyq ánderi «Bir bala» men «Naz qońyrdy» naqyshyna keltire oryndady. Olar bul ónerlerin Ońtústik Koreıa men Qazaqstannyń arasyndaǵy dıplomatııalyq qarym-qatynastyń 25 jyldyǵyna arnalǵan arnaıy kontsertte kórsetti. Koreıa Respýblıkasynyń ulttyq hory konert barysynda káristerdiń ulttyq ánderimen qatar «Trýbador» men «Travıata» operalarynan klaıssıkalyq kompozıtsııalardy da oryndap, elordalyq kórermenderdiń ystyq yqylasyna bólendi.
«Men úshin hor - bul qysty kúngi japalaqtap jaýǵan qar sııaqty. Kózińdi jumyp, hormen aıtylǵan áýezdi ándi tyńdaǵan kezde tylsym áýenniń kókten tómen túsip kele jatqanyn sezinesiń. Adamzatty lázzatqa bóleıtin, osynaý qıyn ómirlik jolda shabyttandyratyn hormen án oryndaý Jaratqannyń bergen syıy sııaqty», - dedi Koreıanyń Qazaqstandaǵy Elshisi Kım De Sık.
1973 jyly qurylǵan Koreıa Respýblıkasynyń ulttyq hory bul eldegi eń birinshi kásibı hor sanalady. Ol jylyna shamamen 60-qa jýyq ret óner kórsetedi. Buǵan deıin hor ujymy Eýropanyń kóptegen elderiniń, AQSh, Reseı, Qytaı, Japonııanyń turǵyndaryn ónerlerimen tánti etken.
Aıta keterligi, koreıalyq óner ujymy aldaǵy ýaqytta Pavlodardaǵa kontserttik baǵdarlamamen barmaq.
