Koreıanyń Qazaqstandaǵy Elshisi: Otbasymen birge vaktsınany alǵashqylardyń biri bolyp aldyq
NUR-SULTAN. QazAqparat - Koreıa Respýblıkasynyń Qazaqstandaǵy Elshisi Ký Hong-sok COVID-19 indetimen kúreste vaktsınalaýdyń mańyzy týraly aıtyp berdi, dep habarlaıdy QazAqparat tilshisi.
«Búginde koronavırýs indetimen Ońtústik Koreıa nemese Qazaqstan ǵana emes, búkil álem elderi bolyp kúresip jatyr. Onyń ishinde Ońtústik Koreıa vırýspen kúresýdi jedel qolǵa alǵan aldyńǵy qatarly elderdiń biri. Qazir bizdiń elde vaktsınatsııa qarqyndy júrip jatyr, halqymyz 50 mln adamdy quraıdy. Búginde elimiz indettiń taralýyn boldyrmaý, toqtatý maqsatynda 150 mln doza vaktsına ázirledi, bul degenimiz halyq sanynan 3 esege artyq», - dedi Ký Hong-sok.
Odan ári, elshi indetpen kúreste vaktsına alýdyń mańyzdy ekenin alǵa tartty.
«QR Prezıdenti Qasym-Jomart Toqaev jáne QR Densaýlyq saqtaý mınıstri Alekseı Tsoı myrza únemi óz sózderinde COVID-19-dy jeńý jáne onyń aldyn alýda vaktsına alýdyń erekshe rólin atap ótedi. Men de vaktsınany qoldap, ol kisilerdiń sózimen tolyqtaı kelisemin. Men otbasymmen jáne elshilik qyzmetkerleri Qazaqstanda koronavırýsqa qarsy vaktsınany alǵashqylardyń biri bolyp aldyq. Biz sol úshin alǵys bildiremiz. Osy oraıda Qazaqstan halqynyń basym bóligi ekpe alyp, qalypty ómirge sátti oralýymyzdy tileımin», - dedi ol.
Buǵan deıin habarlaǵanymyzdaı, búgin Ońtústik Koreıa elshiligi qazaqstandyq dárigerlerge gýmanıtarlyq kómek kórsetti.
