Koreıanyń eks-prezıdenti Pak Kyn He prokýratýraǵa jetkizildi
ASTANA. QazAqparat - Koreıa Respýblıkasynyń burynǵy prezıdenti Pak Kyn He jergilikti ýaqytpen 9:25-te (Astana ýaqytymen 6:25) bas prokýratýra ǵımaratyna keldi.
Pak Kyn He halyqqa esh málimdeme jasamady, jýrnalıster suraǵyna jaýap bermeı, tek «Koreıa halqynan keshirim suraımyn» dep qysqa qaıyryp, bas prokýratýra ǵımaratyna kirip ketti.
Ony vedomstvo qyzmetkerleri kútip alyp, tergeýge alyp ketti. Tergeý 10 saǵattan astam ýaqytqa sozylady dep kútilýde, sebebi Pak Kyn He buǵan deıin prezıdenttik ımmýnıtetin paıdalanyp, tergeýshilerden qashqaqtap júrdi, al oǵan qoıylatyn suraqtar jınalyp qalǵan edi.
Osylaısha, Pak Kyn He kúdikti retinde tergeýge alynǵan Ońtústik Koreıa tarıhyndaǵy tórtinshi prezıdent atanyp otyr. Buǵan deıin mundaı jaǵdaı Ro De Ý, Chon Dý Hvan jáne No Mý Henmen bolǵan edi. Alǵashqy eki prezıdent túrli jazaǵa tartylsa, No Mý Hen óz-ózine qol jumsady. Pak Kyn Hege bılikti asyra paıdalaný, sybaılas jemqorlyq sekildi 13 tarmaq boıynsha aıyp taǵylyp otyr.
Eske sala ketsek, Ońtústik Koreıanyń Konstıtýtsııalyq soty prezıdent Pak Kyn Hege jarııalanǵan ımpıchmentti maquldady . Merzimnen tys jańa prezıdenttik saılaý saılaý 9 mamyrda ótýi múmkin.
Pak Kyn He eldiń burynǵy prezıdentterine beriletin artyqshylyqtardan: jalaqynyń 70% kólemindegi ómirlik zeınetaqydan (shamamen 12 mıllıon von nemese $10,4 myń), úsh kómekshiden, jeke júrgizýshi men memlekettik klınıkalardaǵy tegin medıtsınalyq qyzmet kórsetýden aıyrylady. Sonymen birge, oǵan 10 jylǵa emes, tek 5 jylǵa kúzet beriledi.
