Koreıanyń Ulttyq baleti Astanada «Korsardyń» jańasha nusqasyn usynady
ASTANA. KAZINFORM — 28-29 tamyzda Koreıanyń Ulttyq baleti Astanaǵa gastroldik saparmen keledi. Óner ujymy «Astana Balet» sahnasynda Adolf Adannyń mýzykasyna jazylǵan «Korsar» baletin usynady.
Bul týraly Koreıanyń Ulttyq baletiniń kórkemdik jetekshisi ári bas dırektory Kım Djývon jáne «Korsar» baletiniń horeografy Son Djýnbın Jibek Joly telearnasynyń «Búgin.LIVE» baǵdarlamasynda aıtty.
Marıýs Petıpanyń klassıkalyq horeografııasyna negizdelgen «Korsar» baletinde mahabbat, erkindik jáne shytyrman oqıǵa toǵysady. Koreıanyń Ulttyq baleti qoıylymdy ózderiniń oryndaý mánerimen usynady.
— Astanaǵa «Korsar» baletin alyp kelýimizdiń basty sebebi — koreı baletiniń ereksheligin kórsetý jáne kórermenge ónerpazdarymyzdy tanystyrý. Bul shyǵarma Eýropada da keń tanymal bolǵandyqtan, tańdaýymyz osy baletke tústi, — dedi Koreıanyń Ulttyq baletiniń kórkemdik jetekshisi ári bas dırektory Kım Djývon.
Koreıalyq horeograftar klassıkalyq qoıylymǵa birqatar ózgeris engizgen. Úsh aktili balet eki aktige yqshamdalyp, qazirgi kórermenniń talǵamyna beıimdelgen.
— Horeografymyz shyǵarmany eki aktige qysqartty. Qoıylymǵa zamanaýı ózgerister engizip, kórermenge qyzyqty nusqasyn daıyndadyq. Koreıada baletke qyzyǵýshylyq joǵary, bıletter kóp jaǵdaıda tez satylyp ketedi. «Korsar» da kórermen arasynda tanymal, — dedi Kım Djývon.
Horeograf Son Djýnbın Qazaqstan men Koreıanyń balet ónerinde ortaq tustar kóp ekenin atap ótti. Onyń aıtýynsha, eki el de ulttyq mádenıet pen dástúrdi balet arqyly tanytady.
— Qazaqstanǵa kelmes buryn «Astana Baletiniń» repertýary men qoıylymdaryn zerttedim. Eki eldiń balet ónerinde uqsastyq kóp ekenin baıqadym. Buǵan deıin qazaqstandyq ónerpazdarmen kezdesip, tájirıbe almasqanbyz, — dedi Son Djýnbın.
Kım Djývonnyń aıtýynsha, Qazaqstan men Koreıa arasynda balet salasyndaǵy shyǵarmashylyq baılanys qalyptasqan. Eki eldiń ónerpazdary tájirıbe almasyp keledi.
— Aldaǵy ýaqytta da ártisterimizdiń ózara tájirıbe almasýyn jalǵastyryp, shyǵarmashylyq baılanysty odan ári damytqymyz keledi, — dedi ol.
Aıta keteıik, Astana opera teatrynyń jetekshi solısi Dııas Qurmanǵazynyń jattyǵý kezindegi vıdeosy áleýmettik jelide 34 mln-ǵa jýyq qaralym jınaǵan. Ol da «Búgin.LIVE» baǵdarlamasynda qonaq boldy.
