Koreıanyń Qazaqstandaǵy jańa elshisi senim gramotalarynyń kóshirmelerin tapsyrdy
ASTANA. KAZINFORM — Syrtqy ister mınıstriniń orynbasary Álibek Baqaev jańadan taǵaıyndalǵan Koreıa Respýblıkasynyń elshisi Chjon Kıhonnan senim gramotalarynyń kóshirmelerin qabyldady, dep habarlaıdy SІM baspasóz qyzmeti.
— Kezdesý barysynda taraptar saıası, saýda-ekonomıkalyq jáne mádenı-gýmanıtarlyq salalardaǵy ekijaqty yntymaqtastyqtyń aǵymdaǵy jaǵdaıy men ony odan ári nyǵaıtý perspektıvalaryn talqylap, bıylǵa josparlanǵan bıik jáne joǵary deńgeıdegi ózara saparlar men is-sharalardyń kestesine erekshe nazar aýdardy, — delingen habarlamada.
Ekijaqty saýda aınalymynyń jáne Koreıanyń Qazaqstanǵa tikeleı ınvestıtsııalarynyń eleýli kólemin eskere otyryp, taraptar saýda-ekonomıkalyq yntymaqtastyqty odan ári tereńdetý qajettiligine erekshe mán berdi.
Sonymen qatar dıplomattar kópjaqty formattardaǵy, eń aldymen BUU jáne basqa da halyqaralyq alańdar sheńberindegi tyǵyz yntymaqtastyqty jalǵastyrýǵa daıyn ekendikterin bildirdi.
Kezdesý sońynda Koreıa Respýblıkasynyń elshisi jyly qabyldaý úshin alǵysyn bildirip, eki el arasyndaǵy strategııalyq seriktestikti odan ári nyǵaıtý maqsatynda bar kúsh-jigerin salýǵa daıyn ekenin rastady.
Buǵan deıin Qazaqstan men Koreıa jańa birlesken jobalardy iske asyrýǵa keliskenin jazǵan edik.
