Koreıalyq zerthana reagentterdiń Qazaqstanǵa nelikten jetkizilmeı jatqanyn túsindirdi
ALMATY. QazAqparat – Koronavırýs testileýine qajetti reagentterdiń Ońtústik Koreıadan jetkizilýine taǵy 2 apta kerek. Bul týraly Medical Partners Korea Qazaqstan kompanııasynyń basshysy aıtty, dep habarlaıdy QazAqparat tilshisi.
«MPK Qazaqstan» JShS Ońtústik Koreıadan sapasy joǵary reagent jetkizýmen aınalysady.
«Kompanııa bir aı buryn tapsyrys berip qoıǵanmen, júkti alýǵa, saqtandyrýǵa 2 apta ýaqyt ketken. Ony jetkizýge taǵy 2 apta ýaqyt ketedi.
Qazir Koreıa men Qazaqstan arasynda aptasyna 1-aq reıs ushady. «Air Astana» áýe kompanııasy shuǵyl medıtsınalyq júkti jolaýshylar júginiń kóptigine baılanysty túsirip tastaǵan. Katar arqyly tikeleı reıster tabyldy. Biraq, Doha áýejaıyndaǵy qyzmetkerleriniń 30%-ynan koronavırýs tabylǵan soń olar qazir jumysqa shyqpaıdy. Tapsyrys aptanyń sońynda jetse, biz aıdyń sońynan bastap testileýdi jańarta alamyz», - dedi Medical Partners Korea bas dırektory Mın Hısýk.
Al «Air Astana» áýe kompanııasy júkti qaldyryp ketýge baılanysty túsinik berdi.
«Jolaýshylar reısi Airbus A321neo avıalaınerimen ushty. Bortta 142 jolaýshy, 3732 keli júk boldy. Medical Partners Korea júk tasymaly kompanııasy medıtsınalyq júk baryn aldyn ala eskertken joq.
«Air Astana» júktiń medtsınalyq mańyzy baryn bilmegendikten standartty is-sharalar júrgizgen. Bul ahýaldyń kúrdeliligin eskere otyryp, áýe kompanııasy jaqyn aradaǵy reıste Ońtústik Koreıadan júkti jetkizip berýge ýáde etedi», - dedi «Air Astana» ókili kommýnıkatsııalar departamentinen.
Aıta ketý kerek, Almatyda koronavırýsqa testileýge qatysty qıyndyqtar ótken aptada bastalǵan bolatyn.
Keıbir zerthanalarda qural-jabdyqtar isten shyqsa, keıbirinde testige qajetti reagentter tapshylyǵy týǵan.
