Koreıalyq telearna Denıs Ten týraly fılm kórsetedi
ASTANA. QazAqparat - Jelide qazaqstandyq mánerlep syrǵanaýshy Denıs Ten týraly derekti fılm fragmenti paıda boldy, dep habarlaıdy QazAqparat.
Ózi týraly bıografııalyq fılminiń fragmentin tanymal mánerlep syrǵanaýshy Instagram jelisinde jarııalady. Vıdeo koreı tilinde aǵylshyn sýbtıtrimen berilgen.
Derekti fılmde sportshynyń jaraqat alǵany, jetistikke jetý jolynda qandaı qıyndyqtardan ótkeni baıandalady. Onyń dárigeri Denıstiń aýyrdy dep eshqashan nalymaǵanyn aıtady.
Fılmniń tolyq nusqasy seısenbi kúni Astana ýaqytymen 16:35-te ońtústikkoreıalyq KBS1 arnasynda kórsetiledi. Retranslıatsııa aqpannyń 11-inen 12-sine qaraǵan túni 21:40-ta KBS2 telearnasynda bolady dep kútilýde.
Aıta keteıik, Qazaqstandyq Denıs Ten 2014 jylǵy Qysqy Olımpıada oıyndarynyń qola júldegeri, 2013 jáne 2015 jyldary mánerlep syrǵanaý boıynsha Álem chempıonatynyń kúmis medalin alǵan. 2015 jyly Tórt qurlyq chempıonatynda jeńiske jetip, VII qysqy Azıada oıyndarynyń chempıony atandy. 2017 jyly ótken Qysqy Ýnıversıadanyń jeńimpazy.
