Koreıalyq kompanııa qazaqstandyq mánerlep syrǵanaýshylarǵa qoldaý kórsetti

Bul týraly QazAqparat  New York Times saıtyna silteme jasap habarlaıdy. 

21 aqpan kúni muz alańyna qazaqstandyq mánerlep syrǵanaýshylar  - Elızabet Turynbaeva men Aıza Mambekova shyqqanda, Qazaqstannyń týyn ustaǵan jetpiske jýyq adam óre túregelip, qarsy alǵan.

New York Times saıtynyń habarlaýynsha, aıryqsha shattanǵan jankúıerler Sigong Tech kompanııasynda jumys isteıtin Ońtústik Koreıa azamattary bolyp shyqty. Ótken jyly bul kompanııa Astanadaǵy EXPO-2017 kórmesinde pavılon jobalaýmen aınalysqan eken.

Kompanııa menedjeri Ha ıÝn-sýnniń aıtýynsha, ol 70-ke jýyq Qazaqstan jalaýshalaryna tapsyrys berip, 30 áriptesin ertip, jarysqa barǵan. Qalǵan jalaýshalardy jarys ótip jatqan Kannyn muz saraıynyń ózge kelýshilerine taratyp bergen.

Sigong Tech qyzmetkeri EXPO-da pavılon jobalaýǵa múmkindik bergen eldiń sportshylaryna osylaısha qoldaý bildirgisi kelgen.

«Kópshiligi AQSh-ty biledi, biraq Qazaqstandy bilmeıdi. Biz óz áreketimizben qazaqstandyq sportshylardyń kóńilin serpiltkimiz keldi», deıdi Ha ıÝn-sýn.

Basty foto: olympic.kz