Koreıalyqtarǵa qazaq kúresin úıretemin degen mamandardy qarsy alýǵa daıynbyz – Be Henson
ASTANA. KAZINFORM - V Dúnıejúzilik kóshpendiler oıyndaryna Ońtústik Koreıa sportshylary da qatysyp jatyr. Búgin Koreıa delegatsııasynyń basshysy Be Henson myrzamen suhbattasýdyń sáti túsken edi.
- Be Henson myrza, qazaq elinde ótip jatqan kóshpendiler oıyndaryna qosh keldińizder.
- Bizdi Qazaqstan osy kóshpendiler oıynyna shaqyrǵanyna myń alǵys aıtamyz. Qazaq eline sportshylarymyzdy bastap keldim. Kelýimizge Qazaqstandaǵy bas elshiligimiz jáne osyndaǵy Koreı mádenı ortalyǵyna alǵysymdy bildirgim keledi. Meniń bilýimshe, Qazaqstanda 100 myńnan astam etnıkalyq Koreı halqy turady. Bul – eki eldiń dostyǵynyń aınasy. Osy arqyly eki el sporttyq, týrıstik jáne mádenı turǵydan bir-birimizge tájirıbe almasýǵa bolady dep esepteımin.
- Búgin bir sportshylaryńyz qazaq kúresinen synǵa túskenin kórdik. Qazaqtyń ulttyq kúresin qalaı úırendińizder?
- Koreıalyqtar qazaq kúresimen osyǵan deıin kúresip kórmegen bolatyn. Birinshi ret qazaq kúresinen jarysqa qatysyp otyrmyz. Bizdi V Dúnıejúzilik kóshpendiler oıynyna qatysýǵa Qazaqstan tarapynan usynys jasaldy. Biz qýana kelistik. Biraq qazaqtyń ulttyq sport túrlerin áli bilmeıtin edik. Alaıda oılana kele basqa sport túrlerimen qatar qazaq kúresimen de beldesýge shyǵyp kórýdi jón sanadyq. Sodan keıin, Qazaqstandaǵy áriptesterimizben únemi baılanysta bola otyryp, qazaq kúresiniń erejelerin, aıla-tásilderin vıdeo arqyly úırendik.
- Qazaq kúresi sizderge unady ma? Sizderdiń ulttyq kúresterińizben qandaı uqsastyq baıqaldy?
- Árıne, unady. Kúrestiń barlyǵy birdeı sııaqty kóringenimen, ár eldiń óziniń erekshelikteri kórinedi. Bizdiń kúreste de belimizge belbeý baılaımyz. Alaıda ustaý tásilderi basqasha bolady. Ádis jasaý jaqtarynda da kóptegen ózgeshelik kezdesedi.
- Qazaq kúresiniń ádis jasaý jaqtarynda qandaı qıyndyqtardy baıqadyńyzdar?
- Jalpy, qıyn eshteńe bolmaıdy. Biz birinshi ret qatysyp otyrǵan soń, kishkene qıyndaý bolǵan shyǵar. Bolashaqta qazaq kúresiniń barlyq aıla-tásilin meńgerip alýǵa bolatynyn túsindik.
- Bolashaqta, elderińizge Qazaqstannan qazaq kúresin úıretetin mamandar shaqyrýǵa ne bolmasa qazaq eline kelip qazaq kúresin úırenýge qyzyǵýshylyq bar ma?
- Árıne, eger sizder tarapynan sondaı usynys bolyp jatsa, biz qýana keliser edik. Bizdiń elimizge kelip, koreıalyqtarǵa qazaq kúresin úıretemin degen mamandar bolsa, qarsy alýǵa daıynbyz. Mine, osy kóshpendiler oıyny arqyly bizdiń sportshylarymyz qazaq kúresiniń ne ekenin kórdi. Koreıada da jeti memlekettiń sportshylary birigip ótkizetin halyqaralyq kúres saıysy bar. Bolashaqta, osyndaı saıystarǵa qazaqstandyq balýandar da kelip qosylyp jatsa keremet bolar edi.
