Koreıalyq kompanııalar Qazaqstandaǵy jobalarǵa ınvestor retinde tartylmaq
ASTANA. KAZINFORM — Qazaqstan men Ońtústik Koreıa energetıkadaǵy yntymaqtastyqty keńeıtip jatyr.
Energetıka mınıstrliginde strategııalyq energetıkalyq seriktestiktiń keleshegin talqylaý úshin kelgen Koreıa Respýblıkasynyń ókiletti delegatsııasymen birqatar jumys kezdesýleri ótti.
Sapar aıasynda Energetıka mınıstri Erlan Aqkenjenov Koreıa Respýblıkasynyń joǵary laýazymdy delegatsııasymen kezdesý ótkizdi. Taraptar memleketter arasyndaǵy saıası dıalogtyń joǵary deńgeıin atap ótip, iri ınfraqurylymdyq jáne tehnologııalyq bastamalardy iske asyrýǵa ekijaqty múddelilikti rastady. Salalyq yntymaqtastyqtyń praktıkalyq máseleleri Koreıa Respýblıkasynyń jańa Saýda, ónerkásip jáne resýrstar mınıstri Kım Chon Kvanmen ótken keńeıtilgen kezdesýde talqylandy. Vedomstvo basshylary otyn-energetıka keshenindegi birlesken jobalardy damytýdyń jańa kezeńiniń baǵyttaryn egjeı-tegjeıli qarastyrdy.
Kún tártibinde munaı-gaz salasyndaǵy yntymaqtastyqqa erekshe kóńil bólindi. Qazaqstan tarapy Koreıa ulttyq munaı korporatsııasynyń (KNOC) el naryǵyndaǵy tabysty ári kópjyldyq tájirıbesin atap ótti. Sondaı-aq qazaqstandyq shıki munaıdy Ońtústik Koreıaǵa turaqty ári ózara tıimdi jetkizý máselesi boıynsha ortaq ustanymǵa keldi.
Elektr energetıkasy da negizgi taqyryptardyń biri boldy. Bul saladaǵy basty seriktes – Doosan Enerbility korporatsııasy. Kompanııa Atyraý oblysynda qýaty 310 MVt bolatyn «Qarabatan» bý-gaz qondyrǵysyn sátti iske asyrǵan. Qazirgi ýaqytta Túrkistan oblysynda qýaty 1000 MVt bolatyn iri jobanyń bas merdigeri bolyp jumys júrgizip jatyr.
Kezdesýler qorytyndysynda ońtústikkoreıalyq kompanııalarǵa Qazaqstandaǵy jańa ınfraqurylymdyq jobalarǵa tek merdiger retinde emes, tolyqqandy birlesken ınvestor retinde qatysý usynyldy.
Eki eldiń ókilderi aldaǵy ýaqytta da ozyq tehnologııalardy engizý arqyly ornyqty ekonomıkalyq damýǵa negizdelgen strategııalyq energetıkalyq áriptestikti nyǵaıtýǵa nıet bildirdi.
Aıta ketelik Qazaqstanda ár ınvestorǵa jeke prokýror taǵaıyndalyp, ákimshilik tosqaýyldar joıylady.
