Koreıaǵa jumysqa barǵyńyz kele me? Qazaqstandyqtarǵa qoıylatyn talaptar aıtyldy

Koreıaǵa jumysqa kimder bara alady jáne irikteý qalaı ótedi?

Praktıkalyq irikteý Almaty qalasynda EPS ortalyǵy ashylǵannan keıin bastalady. Osy ortalyqta kandıdattardyń koreı tilin qanshalyqty biletini EPS-TOPIK testi arqyly anyqtalady. Sonymen qatar olardyń kásibı bilimi men daǵdylary baǵalanady. Koreıa Respýblıkasyna attanar aldynda jumysshylar úshin mindetti daıyndyq ta uıymdastyrylady. Іrikteý barysynda azamattyń bilimi, eńbek ótili jáne bar kásibı sertıfıkattary eskeriledi.

Koreıaǵa jumysqa barýǵa 18-den 39 jasqa deıingi jastar qatysa alady. Bul rette azamattyń sottalmaǵan bolýy, Koreıa Respýblıkasynan buryn kúshtep shyǵarylmaǵany jáne elge kirýge tyıym salynbaǵany eskeriledi. Sondaı-aq Qazaqstannan shetelge shyǵýyna eshqandaı shekteý bolmaýy qajet. Kandıdattar belgilengen talaptarǵa saı baldyq júıe arqyly baǵalanady.

Іrikteýden ótken soń Koreıaǵa jumysqa ornalasý qalaı júredi?

Qajetti talaptarǵa saı kelip, barlyq kezeńnen sátti ótken azamattar resmı jumys izdeýshiler tizimine engiziledi. Bul úshin jaramdy tólqujattyń bolýy jáne medıtsınalyq tekserýden ótýi mindetti.

Jeke maǵlumatta bilimi, kásibı tájirıbesi, sertıfıkattary, testileý nátıjeleri jáne qandaı jumysqa ornalasqysy keletini týraly málimetter kórsetiledi. Osy aqparattyń negizinde koreılik jumys berýshiler belgilengen irikteý kezeńderinen ótken azamattardyń arasynan ózderine qajetti qyzmetkerdi tańdaı alady.

— Bul rette mańyzdy nársege nazar aýdarý qajet: emtıhannan ótý jáne resmı kandıdattar tizimine engizilý azamattyń Koreıada avtomatty túrde jumysqa ornalasatynyn bildirmeıdi. Kandıdattardy túpkilikti tańdaý quqyǵy koreılik jumys berýshige tıesili, ıaǵnı jumys berýshi tirkelgen kandıdattardyń arasynan ózine qajetti qyzmetkerdi ózi tańdaıdy, — dep túsindirdi mınıstrlik.

EPS júıesi boıynsha Koreıa Respýblıkasyna jumysqa qabyldanatyn Qazaqstan azamattarynyń sany jyl saıyn Koreıa tarapy aıqyndaıtyn kvotaǵa sáıkes belgilenedi.

Jumys berýshi kandıdatty tańdaǵan soń eńbek shartyn usynady. Qol qoıýǵa deıin qyzmetkerge qandaı jumysty atqaratyny, jumys ýaqyty, eńbek jaǵdaılary jáne basqa da mańyzdy talaptar túsindiriledi. Eki tarap qol qoıǵannan keıin eńbek shartynyń túpnusqasy qyzmetkerge beriledi.

Koreıaǵa jumysqa baratyn azamat úshin aldyn ala daıyndyq kezeńi qarastyrylǵan. Ol Almaty qalasyndaǵy EPS ortalyǵynda ótkiziledi. Daıyndyq aıaqtalyp, jumys vızasy rásimdelgennen keıin azamat Koreıadaǵy jumys ornyna attanady.

EPS arqyly jumys isteý merzimi qansha jáne alaıaqtardan qalaı saqtaný kerek?

EPS júıesi boıynsha jumys isteý merzimi úsh jylǵa deıin bolýy múmkin. Zańnamada kózdelgen jaǵdaılarda bul merzimdi taǵy bir jyl on aıǵa deıin uzartýǵa bolady. Belgilengen jumys merzimin tolyq aıaqtap, Qazaqstanǵa óz erkimen qaıtyp kelgen jumysshylarǵa Koreıa Respýblıkasyna keıin qaıta barý úshin neǵurlym qolaıly jaǵdaılar qarastyrylǵan.

Eńbek mınıstrligi Koreıada jumys isteýdi josparlap otyrǵan azamattarǵa tek memlekettik organdar men ýákiletti uıymdardyń resmı aqparatyn paıdalanýdy eskertedi.

— Azamattar «jumysqa mindetti túrde ornalastyramyz», «irikteýden jedel ótkizemiz» nemese «belgilengen tártipten tys kandıdattar tizimine engizemiz» dep ýáde beretin jeke deldaldarǵa qujattaryn nemese aqshasyn bermeýi qajet. Birde-bir jeke deldal azamatqa Koreıada jumysqa ornalasýǵa kepildik bere almaıdy. Sebebi kandıdattardy túpkilikti tańdaýdy koreılik jumys berýshi júzege asyrady, — delingen habarlamada.

Tirkeýdiń naqty qashan bastalatyny, qujattardy tapsyrý tártibi, EPS-TOPIK testin ótkizý merzimi men tártibi, sondaı-aq irikteýdiń basqa da kezeńderi týraly aqparat Eńbek jáne halyqty áleýmettik qorǵaý mınıstrliginiń resmı resýrstarynda qosymsha jarııalanady.

Osyǵan deıin Qazaqstan azamattary 2028 jyldan bastap Ońtústik Koreıada resmı jumys isteı alatynyn jazǵanbyz.