Koreıaǵa munaı eksportynyń naqty kólemi aıqyndalǵan joq – Energetıka mınıstrligi
ASTANA. KAZINFORM – Bıyl Koreıa Respýblıkasyna munaıdyń naqty qansha kólemi jetkiziletini anyqtalǵan joq. Bul týraly Energetıka mınıstrliginen málim etti.
- 2025 jyldyń qorytyndysynda Qazaqstan munaıyn atalǵan baǵytta jetkizý sharýashylyq júrgizýshi sýbektiler arasyndaǵy kommertsııalyq kelisimsharttar aıasynda júzege asyryldy. Bul rette mınıstrlik munaı eksportynyń jekelegen elder boıynsha esebin júrgizbeıdi. Atalǵan aqparat Qarjy mınıstrligi Memlekettik kirister komıtetiniń quzyretine jatady. Mınıstrlik óz kezeginde eksporttyq baǵyttardy úılestirýdi júzege asyrady jáne óndirý men jetkizýdiń jalpy teńgerimin qamtamasyz etedi, - dep atap ótti mınıstrlikten agenttik saýalyna oraı.
Vedomstvo málimetinshe, jaqynda Energetıka mınıstri Erlan Aqkenjenovtiń Koreıa Respýblıkasynyń Saýda, ónerkásip jáne resýrstar mınıstri Kım Chon Kvanmen kezdesýi barysynda energetıka salasyndaǵy ekijaqty yntymaqtastyqty damytý máseleleri talqylandy. Taraptar ózara is-qımyldy keńeıtýge jáne energııa resýrstaryn jetkizý baǵyttaryn ártaraptandyrýǵa ózara múddelilik tanytatynyn rastady.
- 2026 jylǵa arnalǵan josparlarǵa qatysty aıtar bolsaq, qazirgi ýaqytta Koreıa Respýblıkasyna munaı eksportynyń naqty kólemi aıqyndalmaǵan jáne olar naryq qatysýshylary arasyndaǵy kommertsııalyq kelisimderge, sondaı-aq ekonomıkalyq oryndylyq pen logıstıkalyq múmkindikterdi eskere otyryp qalyptastyrylatyn bolady. Jalpy, mınıstrlik munaı eksportyn jetkizý geografııasyn keńeıtýdi jáne sheteldik áriptestermen ózara tıimdi yntymaqtastyqty damytýdy júıeli túrde qoldaıdy. Bul rette sharýashylyq júrgizýshi sýbektilerdiń operatsııalyq qyzmetine aralaspaıdy, - dedi Energetıka mınıstrliginen.
Mınıstrliktiń naqtylaı túsýinshe, shıki munaıdy satyp alyp, ony ári qaraı eksportqa jáne ishki naryqqa jetkizý, sondaı-aq daıyn munaı ónimderin satyp alý máseleleri ózara tıimdi sharttar negizinde sharýashylyq júrgizýshi sýbektiler arasyndaǵy kelissózder úderisine jatady. «Kásipkerlik kodeksiniń» 18-babyna sáıkes, memlekettiń kásipkerlik sýbektileriniń, olardyń birlestikteriniń qyzmetine zańsyz aralasyna, sondaı-aq atalǵan birlestikterdiń memleket isine aralasýyna jáne olarǵa memlekettik organdardyń fýnktsııalaryn júkteýge jol berilmeıdi.
Buǵan deıin Ońtústik Koreıa Qazaqstannan 18 mln barrel munaı satyp alýǵa keliskenin jazǵan edik.
