Koreıadan Túlkibasqa kelin bolyp túsken Sýdjın Lı baýyrsaq pisirip, et asýdy úırenip aldy

TÚRKІSTAN. QazAqparat - Túrkistan oblysyna kelin bolyp túsken koreı qyzy baýyrsaq pisirip, et asýdy úırenip aldy, dep habarlaıdy QazAqparat tilshisi.

Sáken men Sýdjın Lıdiń otaý qurǵanyna eki aıǵa jýyq boldy. Koreı qyzy Túlkibasqa kelin bolyp túsken soń qazaqy dástúrmen betashar ótti.

Eki jastyń nekesi de meshitte qıyldy. Qazir káris kelin atasy men enesine dámdi as ázirlep, sálem salýdy táp-táýir meńgerip alǵan.

Qazaq tilin endi úırenip júr. Sondyqtan, kópshilikpen sóıleskende joldasy Sáken aýdarmashylyq jasaıdy.

«Kelinim kúnde tańerteń sálem salatyn. Sodan men toqtatyp tastadym. Qazir eki-úsh kún qydyryp kelgende ǵana sálem salady. Soǵan úırettik. Al, qalaǵa qydyryp kelgende apasyn qushaqtap, saǵynǵanyn sezdiredi», - deıdi atasy Baýyrjan Maqulbekov.

Sáken Koreıada 4 jylǵa jýyq jumys istedi. Sol jaqta júrgende Sýdjın Lımen tanysqan.

Kópqabatty úıde turatyndyqtan áke-sheshesimen de kezdesip júripti. Tanystyq sońy mahabbatqa ulasty.

Sodan koreı qyzyn jar etip alǵysy keletinin aıtyp, júregin usyndy. Ata-anasynyń aldynan ótti.

Koreı jaǵy bul usynysqa tosyrqap qalǵanymen keıinnen eki jastyń baqyty úshin kelisimin berdi.

Al, túlkibastyqtar ulynyń Ońtústik Koreıadan kelin ákele jatqanyna qatty qýandy.

«Balam qońyraý soǵyp, kelin ekeýine bılet alyp qoıǵanyn aıtty. Jas emes qoı, sheshimine qarsy bolmadyq. Qazir kelinimizdi izdep otyramyz. Eki-úsh kún qalaǵa ketse saǵynyp qalamyz»,- deıdi qarııa.

Sýdjın Lıge alǵashqyda Túlkibastyń aýa raıy ystyq kóringen. Basy aýyryp, mazasyzdanǵan. Degenmen qazir úırenip qaldy.

Aq oramalyn basynan tastamaıdy. Shalbar kııý degendi de qup kórmeıdi.

Shaıyn qoıyp, asyn ázirlep, ata-enesine báıek bolyp júr. Tipti, qazanǵa asylǵan etti de dámdi etip pisiredi.

Sorpasyna deıin bólek daıyndap, aıran qosyp dastarhanǵa ákeledi. Tek sıyr saýýǵa enesi áli ruqsat etpepti.

«Bir ǵana sıyrymyz bar. Ony úıdegi ózge kelinder-aq saýyp alady. Sondyqtan oǵan ruqsat etpedik», - deıdi enesi.

Jalpy Sýdjın Lı kishkentaı búldirshinderdi jaqsy kóredi. Qaıynaǵalary men abysyndarynyń balalaryn oınatyp, solarmen kóp serýendeıdi.

Alǵashqydaǵy kóbine kúrish pen aşy taǵamdardy jegendi unatatyn. Qazir talǵamaıdy.

«Kelinimizdiń qujattaryn retteý jaǵy qıyndyq týdyryp jatyr. Tipti «deport» jasap jibere me dep ýaıymdap otyrmyz. Sebebi, Koreıadan biraz qujattar aldyryp osynda tirkeýimiz qajet. Soǵan elshilikten úlken kómek bolsa degen ótinishimiz bar. Barlyǵy rettelgen soń Koreıadan qudalardy shaqyryp, ulan-asyr toı jasaýdy josparlap otyrmyz», - deıdi Baýyrjan Maqulbekov.