Koreıadaǵy keme apaty kezinde kapıtan alǵashqylardyń biri bolyp bas saýǵalaǵan
ASTANA. QazAqparat - Koreıa Respýblıkasynyń qıyr ońtústigindegi Chedjý kýrort aralyna jaqyn jerde oryn alǵan keme apaty saldarynan qaza tapqandardyń sany 9-ǵa jetti. Al, 300-ge jýyq adam áli iz-túzsiz, dep jazady Bı-bı-sı.
Buǵan deıin 170 adam qutqaryldy. Degenmen, qutqarýshylar jumysyna qolaısyz aýa raıy kedergi keltirip otyr: apat bolǵan aımaq tumandanyp tur ári sýasty aǵystary tym qatty.
Keme bortynda apat kezinde 462 adam bolǵan. Olardyń kóbi Ońtústik Koreıanyń batysyndaǵy Inchhon portynan Chedjýge bet alǵan mektep oqýshylary.
Joǵalǵandardyń týǵan-týystary bıliktegilerdi apatqa der kezinde mán bermedi jáne aqparatty jasyrdy dep aıyptap otyr.
Qutqarylǵandar ekıpaj qyzmetkerlerin keme qısaıa bastaǵan sátte de «oryndaryńnan qozǵalmańdar» degen buıryǵynan taımaǵany úshin kinálaıdy. Eger áý basta evakýatsııalaý jaıly buıryq bergende aman qalǵandardyń sany áldeqaıda kóp bolar edi deıdi olar. Aıta ketý kerek, sýǵa ketken «Sevol» kapıtany aldyńǵylardyń biri bolyp kemeni tastap qashqan, dep habarlaıdy ITAR-TASS.
