Koreıadaǵy «EXPO-2012» kórmesi aıasynda Astanaǵa vırtýaldy saıahat ashyldy
QR Ekonomıkalyq damý jáne saýda mınıstrligi janyndaǵy Saýda komıtetiniń baspasóz qyzmeti habarlaǵandaı, qazaqstandyq delegatsııanyń quramynda QR Premer-Mınıstrdiń orynbasary Qaırat Kelimbetov, QR Syrtqy ister mınıstrliginiń jaýapty hatshysy, «EXPO - 2017» jobasynyń ulttyq úılestirýshisi Rapıl Jolshybaev, QR Ekonomıkalyq damý jáne saýda mınıstrligi janyndaǵy Saýda komıtetiniń tóraǵasy, «EXPO-2012» kórmesi boıynsha QR Bas komıssary Aıdar Qazybaev bar.
Qazaqstannyń kórme pavılonyn ashqan Q.Kelimbetov bıylǵy daıyndyqqa joǵary baǵa berip, Qazaqstannyń «EXPO-2017» kórmesin óz jerinde ótkizýge tolyq múmkindigi bar ekendigin erekshe atap ótti. «Bıylǵy kórmede Qazaqstannyń pavılony bizdiń barlyq múmkindikterimizdi pash etip, qol jetkizgen jetistikterdi barynsha kórsetip otyr. Ol TMD jáne sheteldiń basqa da pavılondary ishinen erekshe kózge túsip otyr. Bul joǵary daıyndyqty kórsetedi. Menińshe, 2017 jyly Qazaqstannyń «EXPO» kórmesin óz jerinde ótkizýge tolyq múmkindigi bar», - dep atap kórsetti Q.Kelimbetov. Osydan keıin ol «EXPO-2017» konkýrsyndaǵy bizdiń basty básekelesimiz - Belgııanyń kórme pavılonyn aralap kórdi. Bul joly uıymdastyrýshylar Qazaqstan men Belgııanyń pavılondaryn bir-birine qarsy etip ornalastyrdy. Negizgi maqsat - eki úmitkerdi de salystyryp kórý.
«EXPO-2012» kórmesi aıasynda ashylǵan Qazaqstannyń pavılony osy joly birshama keńeıdi. Bıyl qazaqstandyq ekspozıtsııa 774 sharshy metr jerge jaıǵasty. Bizdiń kórme mádenıet, ǵylym, bıznes pen týrızm salasyndaǵy dástúr men ınnovatsııaǵa arnalyp otyr. QR Ekonomıkalyq damý jáne saýda mınıstrligi janyndaǵy Saýda komıtetiniń tóraǵasy, «EXPO-2012» kórmesi boıynsha QR Bas komıssary Aıdar Qazybaevtyń aıtýynsha, qazaqstandyq pavılon alty bólimnen turady. «Kelgen qonaqtar pavılonǵa shyǵarylǵan kórinisterdi tamashalap qana qoımaı, ınteraktıvti shoý-baǵdarlamalaryna qatysyp, Astanaǵa vırtýaldy saıahat jasaı alady», - deıdi A.Qazybaev.
«EXPO-2012» kórmesiniń bıylǵy taqyryby - «Tiri muhıt jáne jaǵalaý aımaǵy: resýrstardyń áralýandyǵy jáne olardy tıimdi paıdalaný». Sebebi búginde jahandyq jylyný, álem muhıttary deńgeıiniń kóterilýi jáne olardyń lastanýy álem jurtshylyǵyn qatty alańdatady. «EXPO-2012» uıymdastyrýshy - koreı halqy osy jahandyq problemalardy keńinen talqylap, oǵan barsha adamzat balasynyń nazaryn aýdarýdy kózdeıdi.
Uıymdastyrý komıtetiniń habarlaýynsha, «EXPO-2012» halyqaralyq kórmesine shamamen 18 mln. adam kelip-ketýi tıis. Qazaqstandyq pavılondy 400 myńnan astam adam kórip ketedi degen boljam bar.
Erteń, mamyrdyń 12-si kúni resmı túrde ashylatyn «EXPO-2012» halyqaralyq kórmesi 3 aıǵa jalǵasyp, 2012 jyldyń 12 tamyzyna deıin jumys isteıtin bolady.
