Koreıada zańsyz júrgen Qazaqstan azamattary ákimshilik jazadan qalaı qutyla alady
«Koreıa Respýblıkasynyń Úkimeti 2018 jylǵy 1 qazannan 2019 jylǵy 31 naýryzǵa deıin Ońtústik Koreıa aýmaǵynda zańsyz júrgen shetel azamattaryna «jasyl dáliz» rejimin engizgenin jarııalady. Osy shara aıasynda qazirgi kezde atalǵan eldiń aýmaǵynda otyz kúnnen kóp júrgen, sondaı-aq vızasy nemese jumys isteýge ruqsaty joq sheteldikter 6 aı merzim ishinde óz elderine esh kedergisiz oralýyna bolady. Bul jaǵdaıda olarǵa eshqandaı aıyppul sharalary qoldanylmaıdy jáne bolashaqta Ońtústik Koreıaǵa qaıta barýyna shekteý qoıylmaıdy. Osy eldiń aýmaǵynan erikti túrde shyqqan Qazaqstan azamattarynyń QR-daǵy Koreıa Respýblıkasynyń dıplomatııalyq ókildikterinen tıisti vıza alǵannan keıin, Koreıaǵa zańdy túrde kedergisiz qaıta kirýine múmkindikteri bar», - dedi Aıbek Smadııarov.
Onyń sózine qaraǵanda, Qazaqstan azamattary atalǵan merzimde óz erkimen shyǵýy úshin Ońtústik Koreıanyń halyqaralyq áýejaılaryndaǵy ımmıgratsııalyq qyzmet ókildikterine aldyn ala qoldarynda bar bıletterimen jáne Qazaqstannyń tólqujatymen barýy qajet.
«2018 jyldyń qazan aıynan bastap Ońtústik Koreıanyń kóshi-qon bılik ókilderi polıtsııamen birlesip, el aýmaǵynda zańsyz júrgen sheteldik mıgranttardy ustaý úshin qatań reıdterdi bastady. Osy sharalar barysynda ustalǵandardy elden óz erkimen ketýshiler dep eseptemeı, kerisinshe olarǵa eldiń zańyn buzýshylar retinde tıisti ákimshilik sharalardy qoldanatyn bolady. Atap aıtqanda, olar qamaýǵa alynyp, 20 mln koreı vonasyna deıin, ıaǵnı 6,5 mln teńge shamasynda aıyppul salynady. Sonymen qatar elden shyǵarylyp, Koreıa Respýblıkasynyń aýmaǵyna 10 jylǵa deıin kirýge tyıym salynady. Osy rette bul elde zańsyz júrgen Qazaqstan azamattaryn «jasyl dáliz» sharasyn paıdalanyp, óz erkimen oralýǵa shaqyramyz», - dedi baspasóz qyzmetiniń jetekshisi.
Onyń aıtýynsha, óz erkimen shyǵý aktsııasy Koreıanyń ımmıgaratsııalyq zańnamasyn buzýshylarǵa ákimshilik jazadan qutylýǵa, sondaı-aq bolashaqta atalǵan elge túrli maqsatpen zańdy túrde qaıta kelýine múmkindik beredi.
QR Syrtqy ister mınıstrliginiń málimetinshe, 2018 jyldyń qańtarynan bastap 31 tamyzǵa deıin Koreıaǵa 38 575 Qazaqstan azamaty saparlaǵan. Bıylǵy shilde kezinde 19 011 adam resmı tirkeýden ótse, 11 561 adam zańsyz ımmıgrant retinde tanyldy.
Budan buryn habarlanǵandaı, QR Syrtqy ister mınıstrligi Ońtústik Koreıaǵa oqýǵa baryp, deportatsııaǵa ushyraǵan stýdentterge qatysty pikir bildirgen bolatyn.
