Koreıada zańsyz júrgen qazaqstandyqtarǵa qatysty baqylaý kúsheımek
ASTANA. KAZINFORM – Eńbek mınıstrligi Qazaqstan azamattarynyń Koreıa Respýblıkasyna kóshi-qonyna baqylaýdy kúsheıtip jatyr. Bul týraly Kóshi-qon komıtetiniń baspasóz qyzmeti habarlady.
Eńbek jáne halyqty áleýmettik qorǵaý birinshi vıtse-mınıstri Asqarbek Ertaev Qazaqstan Respýblıkasy Іshki ister jáne Syrtqy ister mınıstrlikteriniń ókilderimen jumys kezdesýin ótkizdi.
Kezdesýdiń negizgi taqyryby zańsyz kóshi-qonǵa qarsy is-qımyl máseleleri men qazaqstandyq azamattardyń Koreıa Respýblıkasynyń aýmaǵynda zańdy bolýyn qamtamasyz etý boldy.
— Kezdesý qorytyndysy boıynsha Koreıa Respýblıkasyna zańsyz kóshi-qonnyń aldyn alý, sondaı-aq jaqyn arada Qazaqstan Respýblıkasynyń Koreıa Respýblıkasyndaǵy elshiliginde Qazaqstan azamattarynyń bolýyn, onyń ishinde zańsyz kóshi-qon jáne zańsyz eńbek qyzmetin anyqtaý faktilerin qadaǵalaıtyn polıtsııa attashesi taǵaıyndalatyndyǵy týraly máseleler talqylandy, — delingen habarlamada.
Qazaqstan Respýblıkasynyń Eńbek jáne halyqty áleýmettik qorǵaý mınıstrligi bul máseleni turaqty baqylaýǵa aldy. Anyqtalǵan barlyq zań buzý der kezinde tirkelip, ári qaraı qarastyrý úshin Qazaqstan Respýblıkasynyń jáne Koreıa Respýblıkasynyń ýákiletti organdaryna joldanatyn bolady.
Aıta ketelik qazaqstandyqtar qashan Ońtústik Koreıada zańdy jumys isteı alatyny týraly jazǵan edik.