Koreıada zańsyz júrgen qazaqstandyqtardyń máselesi qashan sheshiledi

ASTANA. KAZINFORM — Májilistiń jalpy otyrysynda Koreıada zańsyz eńbek etip júrgen qazaqstandyqtardyń taǵdyryna qatysty másele kóterildi. 

— Ózderińizge málim, Koreıada bolǵan jaǵdaı, prezıdent ornynan ketti. Odan kem degende 2-3 aı mınıstr taǵaıyndalmady, ol suraqtar qaralmady, sonymen sozylyp ketti. Qazir Koreıa tarapy bizge qaıtadan talap qoıyp otyr, ol jol kartasyn qabyldańdar, onyń aıasynda naqty is-sharalardy jazyńdar. Sol is-sharalarmen Koreıada zańsyz júrgen bizdiń azamattardy elińizge qaıtyp alyp ketińizder deıdi. Qazir Syrtqy ister mınıstrligimen, Ulttyq qaýipsizdik komıtetimen birlesip jumys istep jatyrmyz, — dedi Eńbek jáne halyqty áleýmettik qorǵaý mınıstri Svetlana Jaqypova.

Mınıstrdiń aıtýynsha, Qazaqstan Koreıaǵa alǵashqy jospardy usyndy, qazir jospar qaralyp jatyr.

— Negizi olar qol qoıýǵa daıarmyz degen, biz soǵan senemiz. Eger sol jaqtan kelisimder kelse, jyl aıaǵyna deıin maqsat qoıyp otyrmyz, — deıdi vedomstvo basshysy.

Buǵan deıin Koreıada zańsyz júrgen qazaqstandyqtarǵa qatysty baqylaý kúsheıtiletini týraly habarlaǵan edik.