Koreıada zańdy túrde jumys isteý úshin ne isteý kerek – mınıstr jaýap berdi
ASTANA. KAZINFORM – Búginde Ońtústik Koreıada 22 myń qazaqstandyq júr, onyń 6 myńynda vıza merzimi ótip ketken. QR Eńbek jáne halyqty áleýmettik qorǵaý mınıstri Svetlana Jaqypova Koreıada zańdy jumysqa barý úshin ne isteý keregin aıtyp berdi.
Qazaqstan basqa elderde jumys isteıtin otandastardyń eńbek jáne áleýmettik quqyqtaryn qamtamasyz etý boıynsha 8 úkimetaralyq kelisim bekitedi.
«Ońtústik Koreıa boıynsha memlekettik organdarmen kelisimshart kelisildi, maquldandy jáne Syrtqy ister mınıstrligi arqyly Koreıa tarapyna jiberildi. Qazir Koreıa tarapy bul kelisimdi qarastyryp jatyr. Endi biz Almaty qalasynda ál-Farabı ýnıversıtetiniń negizgi sertıfıkatsııalaý ortalyǵynda Koreıaǵa shyǵatyn azamattardyń bilim sapasyn tekserý men aýdıt jasaý ornyn ázirledik», - dedi S.Jaqypova mınıstrliktiń alqa otyrysynda.
Sonymen birge, Qonaev qalasynda óndiristik bazalar daıyndaldy, onda Koreıaǵa barǵysy keletin qazaqstandyqtar 2-4 aıǵa deıin tildik jáne mamandyǵyna qaraı óndiristik daıyndyqtan óte alady.
«Daıyndyqtan ótken adam koreı tili men biliktiligi boıynsha test tapsyrady. Ony Koreıadan arnaıy kelgen aýdıtor qadaǵalaıdy. Barlyq synaq kezeńinen ótken adam Koreıaǵa baryp, zańdy túrde eńbek ete alady», - dep túsindirdi Eńbek mınıstri.
