Koreıada úısiz-kúısiz júrgen qazaqstandyqtar az emes - QR SІM
ASTANA. QazAqparat - Qazaqstan men Ońtústik Koreıa ekijaqty vızasyz rejımdi engizgennen keıin qazaqstandyq ımıgranttardyń sany kúrt ósti, dep xabarlaıdy QazAqparat tilshisi.
«Máselen, aǵymdaǵy jyldyń ortasynda Qazaqstannan Ońtústik Koreıaǵa zańsyz kóship barǵandardyń sany 5 500 adamdy qurasa, jyldyń aıaǵyna qaraı atalǵan kórsetkish 6 500-den asty. Bylaısha aıtqanda, ol jaqta zańsyz eńbek mıgranttarynyń sany kúrt kóbeıdi», - dedi QR Syrtqy ister mınıstrligi Konsýldyq qyzmet departamentiniń dırektory Ardaq Madıev Astanada ótken baspasóz máslıxatynda.
Onyń aıtýynsha, qazaqstandyqtar Oństústik Koreıada zańsyz júrgennen keıin san alýan jaǵdaılarǵa tap bolady. Qylmys jasaıdy.
«Adam óltirýden bastap zorlyq-zombylyq, órt salý men urlyqqa deıin barady. Qańǵybas bolyp ketkender de bar. Koreıanyń aqparaty boıynsha qazir qara rıeltorlar toby bar. Olar qazaqstandyqtardy jınap, Koreıaǵa zańsyz jumysqa jiberip otyrady. Ondaı adamdar qara jumys istep, jan túrshigerlik jaǵdaıda ómir súredi. Olarda eshqandaı eńbek kelisimsharty da, eshqandaı medıtsınalyq saqtandyrý da bolmaıdy. Jaraqat alsa da, elge oralmaıdy. Qańǵybas bolyp júre beredi», - dep atap kórsetti A.Madıev.
