Koreıada tolassyz jaýynnan 14 adam qaza taýyp, 12-si iz-túzsiz joǵaldy

ASTANA. KAZINFORM — Ońtústik Koreıada bes kún boıy jaýǵan nóser jańbyr saldarynan 14 adam qaza taýyp, taǵy 12 adam iz-túzsiz joǵalǵan, dep jazady Sınhýa.

Bul týraly jeksenbi kúni eldiń Іshki ister jáne qaýipsizdik mınıstrligi habarlady.

Mınıstrliktiń málimetinshe, jeksenbi kúni jergilikti ýaqytpen saǵat 11:00-degi jaǵdaı boıynsha 14 adamnyń qaza tapqany rastalyp, 12 adam joǵalǵandar qatarynda sanalyp otyr.

Sársenbide bastalǵan tolassyz jaýyn-shashyn saldarynan el boıynsha 13 209 adam úı-jaıyn tastap ketýge májbúr bolǵan. Onyń ishinde 3 836 adam ýaqytsha evakýatsııalyq beketterde ornalastyrylǵan.

Sondaı-aq 1 920 memlekettik jáne 2 234 jeke nysanǵa zaqym kelgeni tirkeldi. Olardyń qatarynda sý astynda qalǵan joldar, kóshkinder, ózen qurylymdarynyń qulaýy, sý basqan ǵımarattar men egistik alqaptar bar.

Budan buryn habarlanǵandaı, 18 shildede Ońtústik Koreıada úsh kún qatarynan jaýǵan nóser jaýyn saldarynan 4 adam mert boldy. Taǵy 1 adam iz-túzsiz joǵalyp, 5 myń adam evakýatsııalanǵany habarlanǵan edi.