Koreıada sottalǵan 25 qazaqstandyqty elge qaıtarýǵa múmkindik jasalmaq

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasy men Koreıa Respýblıkasynyń arasyndaǵy sottalǵan adamdardy berý týraly shartty ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

«Memleket úshin shetelde júrgen azamatty qorǵaý – Konstıtýtsııa júktegen mindetimiz. Sebebi Konstıtýtsııaǵa sáıkes elimizden tys jerlerde júrgen azamattardy qorǵaýǵa jáne olarǵa qamqorlyq jasaýǵa kepildik beremiz. Sondyqtan basqa elde qylmys jasap, sottalǵan azamattardy tastap ketpeımiz. Búgingi sharttyń negizgi maqsaty - sottalǵan adamdardy ózara almasý, olardy berý joldaryn retteý», - dedi QR Bas prokýrorynyń orynbasary Marat Ahmetjanov qujat boıynsha jasaǵan baıandamasynda.

Sottalǵan adamdar mynadaı jaǵdaılarda beriledi:

- eger sotttalǵan adam elimizdiń ne Koreıanyń azamaty bolyp tanylsa;

- sot úkimi zańdy kúshine engen bolsa;

- berý týraly suraý salý alynǵan kezde keminde bir jyl óteıtin merzimi qalsa;

- jasaǵan áreketi eki jaqta da qylmys bolyp tanylsa;

- eki memleket sottalǵandy ózara berýge kelisse.

Onyń aıtýynsha, osy talaptar saqtalmasa, sottalǵan adamdar berilmeıdi. Qazaqstanǵa qaıtarylǵan adam Koreıa sotynyń úkimi boıynsha óz jazasyn óteıdi. Eger Qazaqstan men Koreıanyń zańdary sáıkes bolmasa, ıaǵnı úılespese, onda sot úkimi elimizdiń zańda kózdelgen jazaǵa saı keltiriledi.

«Alaıda jazanyń sıpaty men uzaqtyǵy Koreıa soty taǵaıyndaǵan jazadan qatal bolmaýǵa tıis. Búgingi tańda Koreıada 25 qazaqstandyq jazasyn ótep jatyr. Bizde Koreıanyń bir azamaty jazaǵa tartyldy. Usynylyp otyrǵan kelisimge ratıfıkatsııa jasalǵan jaǵdaıda bul azamattardy elge qaıtarýǵa múmkindik týady. Olar elge kelip, áleýmettik ortasynda jazasyn óteıdi», - dedi M. Ahmetjanov.