Koreıada Ońtústik-Shyǵys Azııa elderi qazaqtarynyń II kishi quryltaıy ótti
SEÝL. KAZINFORM – Koreıanyń Seýl qalasynda Ońtústik-Shyǵys Azııa elderindegi qazaqtardyń II kishi quryltaıy ótti. Bul týraly «Otandastar qory» baspasóz qyzmetinen málim etti.
Quryltaıǵa Koreıa, Malaızııa, Japonııa, Qytaı jáne Mońǵolııa elderinen 200-ge jýyq otandastarymyz qatysty. Quryltaıdyń ashylýynan bastap ár otyrysynda Qazaqstan men sheteldegi qazaqtardyń mádenı, ekonomıkalyq jáne rýhanı yntymaqtastyǵyn nyǵaıtýǵa baǵyttalǵan túrli máseleler keńinen talqylandy.
Quryltaı aıasynda qazaq kitaptary men qolónershi, sýretshi Aqmaral Bahıtovanyń ulttyq naqyshta salynǵan sýret kórmesi uıymdastyryldy. Bul kórme qazaqtyń dástúrli mádenıetin nasıhattaýǵa jáne ulttyq ónerdiń erekshelikterin sheteldik kórermenderge tanystyrýǵa baǵyttalǵan erekshe shara boldy. Kórme qonaqtary qazaqtyń baı mádenı murasyn óner týyndylary arqyly tereńirek tanyp, ulttyq ónerdiń zamanaýı ınterpretatsııalaryna kýá boldy.
Quryltaıdyń ashylýynda QR Koreıa Respýblıkasyndaǵy Elshisi Nurǵalı Arystanov Almasbaıuly, «Otandastar qory» KeAQ prezıdenti Danııar Qadyrov jáne Seýldegi «Qazaq Nomad» qazaq qaýymdastyǵynyń ókili Týrlan Janesenov sóz sóıledi.
Elshi sózinde quryltaıdyń sheteldegi qazaq mádenıetin damytýdaǵy mańyzdylyǵyn erekshe atap ótti. Ol qazaq dıasporasynyń mádenı birligin nyǵaıtý, ulttyq qundylyqtardy saqtaý jáne keleshek urpaqqa jetkizý jolyndaǵy osyndaı is-sharalardyń mańyzdy ekenin tilge tıek etti.
Sonymen qatar, quryltaıdyń Qazaqstan men Koreıa arasyndaǵy mádenı baılanystardy nyǵaıtýǵa qosatyn úlesi zor ekenin aıtyp, aldaǵy ýaqytta qazaq dıasporasy ókilderimen birlesip júzege asyrylatyn mádenı jobalarǵa qoldaý bildiretinin jetkizdi.
Danııar Qadyrov quryltaıdyń basty maqsaty sheteldegi otandastarmen baılanysty arttyryp, birlikti nyǵaıtý ekenine toqtaldy. Ol «Otandastar qorynyń» sheteldegi otandastardy qoldaý boıynsha júzege asyryp jatqan jobalary týraly baıandap, Qazaqstannyń álemdik deńgeıde tanylýy jolyndaǵy mádenı bastamalardyń mańyzdylyǵyn atap ótti.
Al Týrlan Janesenov Koreıadaǵy qazaq jastarynyń birligin arttyrýǵa baǵyttalǵan jobalar týraly aıtyp, quryltaıdyń shetelde ulttyq mádenıetti saqtap qalýdaǵy mańyzdylyǵyna nazar aýdartty.
Quryltaıdyń birinshi kúni qazaq mádenıetin nasıhattaý, ulttyq dástúrlerdi shetelde saqtaý jáne ekonomıkalyq yntymaqtastyqty damytý máseleleri boıynsha jalpy otyrystar ótti.
Quryltaı aıasynda «Otandastar qory» KeAQ pen Qazaqstannyń Koreıa Respýblıkasyndaǵy Elshiliginiń uıymdastyrýymen alǵash ret shetelde qazaq tilinde sheshendik saıysy uıymdastyryldy. Oǵan Hangýk shet tilder ýnıversıtetiniń jeti stýdenti qatysyp, eki eldiń mádenıeti, salt-dástúr uqsastyqtary men Abaı shyǵarmashylyǵy týraly mazmundy baıandamalar jasady.
Birinshi oryndy Hangýk shet tilder ýnıversıtetiniń ІІ kýrs stýdenti Lı So En jeńip aldy.
- Mádenıet salasynda jaqynyraq bolý úshin jıi kezdesip, sóılesý kerek dep oılaımyn. Men qazaq tilin jaqsy úırenip, eki el arasynda jaqsy qarym-qatynas jasaýǵa úles qosqym keledi, - dedi Lı So En.
Quryltaıdyń ekinshi kúni Naýryz merekesi keń kólemde atap ótildi. Merekelik shara barysynda ashyq alańda «Otandastar qorynyń» «Qorjyn» jobasy aıasynda Koreıadaǵy otandastarǵa syıǵa tartylǵan alty qanatty kıiz úıi ornatyldy. Kıiz úıdiń janynda ulttyq kıimder men sýretter kórmesi qoıylyp, qazaqtyń dástúrli mádenıeti keńinen nasıhattaldy. Kıiz úıdiń kórinisi men ulttyq naqyshtaǵy zattar merekege jınalǵan kópshiliktiń erekshe qyzyǵýshylyǵyn týdyrdy.
Naýryz merekesi aıasynda qazaqtyń dástúrli oıyndary da oınatyldy. Quryltaı qonaqtary asyq atý, arqan tartý, láńgi jáne toǵyzqumalaq sııaqty ulttyq oıyndarǵa belsene qatysyp, qazaqtyń dástúrli sporttyq oıyndaryn erekshe yqylaspen qabyldady.
- Quryltaı sheteldegi qazaq dıasporasy ókilderimen mádenı jáne ekonomıkalyq yntymaqtastyqty nyǵaıtýǵa, qazaqtyń ulttyq qundylyqtaryn dáripteýge jáne bolashaqta birlesken jobalardy júzege asyrýǵa serpin berdi. Bul quryltaı sheteldegi qazaq qaýymdastyǵynyń birligin arttyrýmen qatar, qazaq mádenıetin halyqaralyq deńgeıde nasıhattaý men ekonomıkalyq seriktestikti damytýǵa arnalǵan mańyzdy qadam boldy. Qazaqstan men Ońtústik-Shyǵys Azııa elderindegi qazaq dıasporasynyń mádenı jáne ekonomıkalyq baılanystaryn nyǵaıtý maqsatynda birqatar joba talqylandy, - dep atap ótedi «Otandastar qorynan».
Aıta keteıik, qandastardy qabyldaýdyń 2025 jylǵa arnalǵan óńirlik kvotasy bekitildi.