Koreıada koronavırýs juqtyrǵandar sany 6 myńnan asty
SEÝL. YONHAP– QazAqparat – Juma kúni Ońtústik Koreıa koronavırýs juqtyrǵan 518 jańa jaǵdaı tirkeldi. Eldegi aýrý juqtyrǵandardyń jalpy sany 6284 adamǵa jetti, dep habarlaıdy QazAqparat Yonhap agenttigine silteme jasap.
Vırýs juqtyrǵan jańa jaǵdaılardyń kópshiligi vırýs oshaǵyna aınalǵan eldiń ońtústik-shyǵysyndaǵy Tegý qalasy men Soltústik Kensando prvıntsııasynda anyqtalǵan.
Koreı aýrýlardy baqylaý jáne aldyn alý ortalyǵynyń (KCDC) málimetine sáıkes, Ońtústik Koreıada ótken jyldyń sońynda Qytaıda paıda bolǵan jańa vırýstan 42 adam kóz jumǵan. Olar negizinen sozylmaly aýrýlary bar egde jastaǵy naýqastar.
Rastalǵan jaǵdaılardyń 60 paıyzǵa jýyǵy 2,5 mıllıon halyq turatyn, úlkendigi jóninen eldiń tórtinshi qalasy Tegýdaǵy Sınchhondjı (Shincheonji) dinı sektasynyń fılıalymen baılanysty.
Bılik qaladaǵy vırýstyń taralý deńgeıiniń artýyna alańdaýly.Mekdıtsınalyq mekemeler Tegýde azamattardy tekserýden ótkizýdi bastady.
Koreı aýrýlardy baqylaý jáne aldyn alý ortalyǵynyń málimetinshe, beısenbi kúni anyqtalǵan 518 jańa jaǵdaıdyń 367-si Tegýda, 123-i kórshiles Soltústik Kensando provıntsııasynda tirkelgen.
Sondaı-aq, Seýlde vırýs juqtyrǵan taǵy eki jaǵdaı týraly habarlandy.
Sońǵy málimetter boıynsha, 100 el men aýmaq koronavırýstyń taralý qaýpine baılanysty Ońtústik Koreıa turǵyndary úshin karantın rejımin kúsheıtýdi nemese kirýge shekteý engizýdi josparlap otyr.
