Koreıada avtobýs júrgizýshisine shabýyldaǵan qazaqstandyq áıel 3 jyl boıy emdelip kelgen

ASTANA. QazAqparat – QR Syrtqy ister mınıstrliginiń resmı ókili Aıbek Smadııarov Ońtústik Koreıada avtobýs júrgizýshisine pyshaqpen tap bergen qazaqstandyq áıel týraly maǵlumat berdi, dep habarlaıdy QazAqparat.

Áleýmettik jelide Seýlde Qazaqstan azamaty avtobýs júrgizýshisine pyshaqpen shabýyl jasaǵany habarlanǵan edi.

«Jaqynda Seýldan bizdiń azamatymyz jergilikti turǵynǵa shabýyl jasady degen aqparat aldyq. Máseleniń mán-jaıyn anyqtadyq. Ol áıeldiń ulty káris, kúıeýi ekeýi Koreıada uzaq jyldar boıy turyp keledi. Oǵan etnıkalyq vıza bergen jáne bıznespen aınalysqan. 2020 jyldan beri arnaıy aýrýhanada statsıonarlyq em alyp kelgen. Oqıǵa bolǵanda da dárilik preparat yqpalynda bolýy múmkin», - dedi Aıbek Smadııarov mınıstrliktiń aptalyq brıfınginde.

Resmı ókildiń aıtýynsha, jaqynda Qazaqstan konsýly áıeldiń jaǵdaıyn bilýge barady. Másele tolyq baqylaýǵa alynǵan.