Koreıada Astana memlekettik qyzmet habynyń koreı ortalyǵy qurylmaq
ASTANA. KAZINFORM - Koreıa Respýblıkasy Prezıdenti delegatsııasynyń Qazaqstanǵa resmı sapary aıasynda Astana memlekettik qyzmet habynyń Basqarýshy komıteti tóraǵasy Alıhan Báımenov pen Koreıa Respýblıkasy Personaldy basqarý mınıstri Kım Syn Ho Koreıada Astana memlekettik qyzmet habynyńortalyǵyn qurý boıynsha ózara túsinistik memorandýmyna qol qoıdy.
Memorandým - eki tarap arasyndaǵy uzaq merzimdi jemisti yntymaqtastyq nátıjesi. Koreıadaǵy Astana memlekettik qyzmet haby ortalyǵy qyzmeti yntymaqtastyq shekaralaryn keńeıtýge, sondaı-aq memlekettik qyzmet salasyndaǵy ozyq tájirıbelerdi taratýǵa baǵyttalady.
Taraptar osy kelisim eki eldiń de órkendeýi maqsatynda memlekettik qyzmettiń tıimdi damýyna yqpal etetin jańa kezeń bolatynyn atap ótti. Bul bastama personaldy basqarý salasynda ınnovatsııalardy engizý men halyqaralyq yntymaqtastyqty nyǵaıtýdy qamtamasyz ete otyryp, jańa perspektıvalarǵa jol ashady.
Memorandýmǵa qol qoıa otyryp, Alıhan Báımenov Hab «Mınıstrliktiń Koreıada Hab ortalyǵyn qurý týraly bastamasyn, bir jaǵynan bizdiń atqarǵan jumysymyzǵa, ekinshi jaǵynan Habtyń memlekettik qyzmet salasyndaǵy halyqaralyq yntymaqtastyqty odan ári damytý áleýetine berilgen joǵary baǵa» dep qarastyratynyn aıtty.
