Koreıada 20 mln. adamnyń nesıelik kartochkasyndaǵy málimetter urlandy
ASTANA. 21 qańtar. QazAqparat - Ońtústik Koreıada el halqynyń jartysyna jýyǵynyń nesıelik kartochkasynyń esebi týraly málimet urlandy, dep habarlaıdy VVS.
Derekterdi nesıelik málimet týraly esep júrgizetin Korea Credit Bureau komanııasynyń qyzmetkerleri urlaǵan. Olar eldiń 20 mln. azamatynyń aty-jóni men nesıelik kartochkalaryn jáne áleýmettik saqtandyrý nómirlerin kóshirip alyp, marketıngtik kompanııalarǵa satqan.
Búginde atalǵan qylmysty jasaǵan qyzmetkerler qolǵa tústi. Sondaı-aq urlanǵan málimetterdi satyp alǵan marketıngtik kompanııalardyń birqatar basqarýshylary da qamaýǵa alyndy, delingen habarlamada.
Tergeý kezinde belgili bolǵandaı, Korea Credit Bureau kompanııasynyń qyzmetkeri Ońtústik Koreıadaǵy úsh iri nesıelik kompanııanyń málimetter bazasyna kirip, ondaǵy aqparatty flesh-kartaǵa kóshirip alǵan.
Búginde resmı organdar atalǵan úsh kompanııanyń qaýipsizdik rejimine baılanysty tergeý júrgizýde. Al málimetterdiń urlanýyna jol bergen KB Kookmin Card, Lotte Card jáne NH Nonghyup Card kompanııalarynyń basshylary óz kinálaryn moıyndap, tutynýshylarynan keshirim surady.
Ońtústik Koreıanyń qarjylyq baqylaý jónindegi memlekettik mekemesi osy oqıǵadan zardap shekken tutynýshylardyń shyǵynyn kredıttik kompanııalardyń jabatynyn aıtty.
Jalpy, Koreıada osyǵan uqsas qylmystar buǵan deıin de oryn alyp keldi. Máselen, 2012 jyly KT Mobile uıaly baılanys kompanııasynyń 8,7 mln. tutynýshysy týraly málimetti urlaǵan eki haker sottaldy. Odan bir jyl buryn hakerler eldegi 35 mln. adam qoldanatyn Cyworld áleýmettik jelisiniń ortalyq serverin buzǵan bolatyn.
