Koreıa tutynatyn ýrannyń úshten birin Qazaqstannan ımporttaýda
ASTANA. QazAqparat - Ońtústik Koreıadaǵy tutynatyn ýrannyń úshten bir bóligin Qazaqstannan ımporttap jatyr. Bul týraly búgin Astanadaǵy baspasóz máslıhatynda Koreıa Respýblıkasyndaǵy Qazaqstannyń Tótenshe jáne Ókiletti Elshisi Dýlat Baqyshev málim etti, dep habarlaıdy QazAqparat.
«Ýran boıynsha birneshe sharttar boldy. Ońtústik Koreıa tutynatyn ýrannyń 30 paıyzǵa jýyǵy Qazaqstannan jetkiziledi»,-dedi Elshi.
Aıta keteıik, eki el arasyndaǵy taýar aınalymynyń kólemi 2016 jyly 676 mln. AQSh dollaryna jetip, onyń ishinde eksport - 223 mln. dollar, al ımport 453 mln. dollardy qurady. 2015 jylmen salystyrǵanda buo kórsetkish eki eseden astamǵa qysqardy. Ońtústik Koreıaǵa qazaqstandyq eksporttyń negizgi quramyn ýran, ferroqorytpa, qospasyz bolat prokaty, altyn, mys alyp otyr.
Al Qazaqstanǵa bul elden elektronıka, mashına qurylysynyń jabdyqtary, kólik quraldarynyń shanaǵy jáne basqa da ónimder tasymaldanady.
Eske sala keteıik, Qazaqstan 2009 jyly ýran óndirisi boıynsha álemde birinshi orynǵa shyqty jáne baǵanyń turaqsyzdyǵyna qaramastan, bul ornyn qazirgi ýaqytqa deıin saqtap keledi. Qazaqstan álemdik ýran óndirisiniń 40 paıyzyn shyǵarýda.
