Koreıa syrtqy ister mınıstri Qazaqstanǵa resmı saparmen keledi

ASTANA. QazAqparat – Koreıa Respýblıkasynyń Syrtqy ister mınıstri Pak Chjın Qazaqstanǵa resmı saparmen keledi. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«30 mamyr men 1 maýsym aralyǵynda Koreıa Respýblıkasynyń Syrtqy ister mınıstri Pak Chjınniń Qazaqstan Respýblıkasyna resmı sapary ótedi. Sapar barysynda Qazaqstan Premer-Mınıstriniń orynbasary - Syrtqy ister mınıstri Murat Nurtileýmen ekijaqty kelissózderi josparlanǵan», - dedi resmı ókil vedomstvoda ótken aptalyq brıfıngte.

Aıbek Smadııarovtyń atap ótýinshe, taraptar keńeıtilgen strategııalyq áriptestiktiń, onyń ishinde saıası, ekonomıkalyq jáne mádenı ózara is-qımyl salalaryndaǵy Qazaqstan-Ońtústik Koreıa qatynastarynyń aǵymdaǵy jaı-kúıi men perspektıvalaryn talqylaıdy.

«Halyqaralyq uıymdar men forýmdar aıasynda eki eldiń yntymaqtastyǵy boıynsha pikir almasý josparlanyp otyr. Sapar aıasynda koreı mınıstriniń memleket basshylyǵymen kezdesýi josparlanǵan», - dedi ol.