Koreıa Respýblıkasynyń BUU janyndaǵy delegatsııasy Qaýipsizdik keńesine hat tapsyrdy
ASTANA. Maýsymnyń 5-i. QazAqparat - BUU janyndaǵy Koreıa Respýblıkasynyń delegatsııasy juma kúni Qaýipsizdik Keńesiniń tóraǵasyna ońtústikkoreılik «Chhonan» kemesiniń apatyna baılanysty jaǵdaıdy talqylaý úshin májilis shaqyrý týraly ótinish-hat tabys etti, dep habarlaıdy ITAR-TASS agenttigi.
Jýrnalısterge derek kózderden málim bolǵandaı, hatta «óńirde qalyptasqan kúrdeli jaǵdaıǵa laıyqty ún qatý» týraly ótinish aıtylyp otyr. Qaýipsizdik Keńesiniń músheleri bul máseleni qashan qaraıtyny ázirge beımálim.
Buǵan deıin Koreıa Respýblıkasynyń Prezıdenti Lı Men Bak, naýryzdyń 26-synda sary teńizde ońtústikkoreılik «Chhonan» korvetiniń sýǵa batýyna Soltústik Koreıanyń qatysy týraly máseleni qaraý jáne Phenıandy jaýapqa tartý týraly BUU Qaýipsizdik Keńesine ótinish jasaǵanyn málim etken bolatyn.
Ońtústik Koreıa Prezıdenti, Phenıannan atalǵan oqıǵaǵa óziniń qatysyn moıyndap, jaýapkershilikti moınyna alǵanyn jáne Ońtústik Koreıa men álem qoǵamdastyǵynan keshirim suraǵanyn talap etti. Onyń aıtýynsha, «Koreıa Halyq Demokratııalyq Respýblıkasy óziniń kinásin moıyndaýy jáne budan bylaı mundaı áreketterge barmaýǵa ýáde berýi kerek».
