Koreıa Respýblıkasy Qazaqstanǵa gýmanıtarlyq kómek jiberdi
NUR-SULTAN. QazAqparat - Búgin Densaýlyq saqtaý vıtse-mınıstri – QR Memlekettik bas sanıtarlyq dárigeri Erlan Qııasov Koreıa Respýblıkasynyń Úkimeti jibergen gýmanıtarlyq kómekti QR-ǵa berý rásimine qatysty, dep habarlaıdy QazAqparat atalmysh vedomostvonyń baspasóz qyzmetine silteme jasap.
Іs-sharaǵa Koreıanyń Qazaqstandaǵy Tótenshe jáne Ókiletti Elshisi Ký Hong-Sok jáne DDSU-nyń
Qazaqstandaǵy ókildiginiń basshysy, doktor Kerolaın Klarınvıl qatysty.
Koreıa Respýblıkasynyń Úkimeti Qazaqstanǵa COVID-19 shaldyqqan patsıentterge 72 ottegi kontsentratory, 50 monıtor jáne 111 000 dana FFP2 standartty respıratorlyq qorǵanys maska jibergen. Gýmanıtarlyq kómektiń quny - 375 000 dollar.
«QR Densaýlyq saqtaý mınıstrliginiń atynan jáne óz atymnan Koreı sarapshylaryna COVID-19-ǵa qarsy kúreste gýmanıtarlyq jáne konsýltatsııalyq kómek kórsetkeni úshin alǵys bildirgim keledi. Bul eki memleket arasyndaǵy dostyqtyń, sondaı-aq pandemııaǵa qarsy halyqaralyq yntymaqtastyqtyń aıqyn kórinisi. DDSU-ǵa da COVID-19-ǵa qarsy kúreste
qoldaý kórsetkeni úshin alǵys aıtamyz. Bul uıymdar arasyndaǵy seriktestik qarym-qatynastyń taǵy bir dáleli», - dedi E.Qııasov.
Qazaqstan Koreıa Respýblıkasymen yntymaqtastyqqa kóp mán beredi. Buǵan deıin Koreıa úkimeti Qazaqstandaǵy medıtsınalyq mekemelerge COVID -2019 anyqtaý úshin jedel test tapsyrý jaǵynan gýmanıtarlyq kómek kórsetken bolatyn. Bıyl mamyr aıynda Almaty qalasynda «Medical Partners Korea» koreı kompanııasynyń qoldaýymen Ońtústik Koreıa tehnologııasy boıynsha qurylǵan koronavırýs ınfektsııasynyn anyqtaý boıynsha mobıldi skrınıng ortalyǵy ashyldy.
19 qazanda Koreıa Úkimetinen gýmanıtarlyq kómek retinde 425 000 dollar somasyna koreıalyq «Seegene» kompanııasy óndirgen «2019-nCOV Assay» PTR-testiniń 388 jıyntyǵyn aldyq.
Sonymen qatar, qazaqstandyq medıtsına mamandary Koreıanyń densaýlyq saqtaý ındýstrııasyn damytý ınstıtýtynyń qoldaýymen uıymdastyrylǵan COVID-2019 máseleleri boıynsha oqytý vebınarlaryna turaqty túrde qatysady.
