Koreıa prezıdentiniń Ózbekstanǵa sapary: Taraptar 17 qujatqa qol qoıdy
TAShKENT. KAZINFORM – Ońtústik Koreıa prezıdenti ıÝn Sok Eldiń Ózbekstanǵa jasaǵan memlekettik sapary aıasynda 17 qujatqa qol qoıyldy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
ıÝn Sok Eldi Ózbekstanǵa sapary «Kóksaraı» rezıdentsııasyndaǵy resmı kútip alý saltanatynan bastaldy.
Ózbekstan prezıdenti Shavkat Mırzıeev mártebeli meımandy jyly qarsy aldy. Memlekettik ánurandar shyrqaldy, artynsha eki el basshylary resmı delegatsııa múshelerimen amandasty.
Sýretke túsý rásiminen soń memleket basshylary shaǵyn quramda kelissóz ótkizdi.
Onyń barysynda saıası, saýda-ekonomıkalyq, tehnologııalyq jáne basqa da mańyzdy salalar boıynsha ózara is-qımyldy odan ári keńeıtý máseleleri qaraldy.
Ózbekstan basshysynyń baspasóz qyzmetinen málim etkendeı, resmı Seýl Tashkenttiń jetekshi saýda jáne ınvestıtsııalyq seriktesteriniń qataryna kiredi. Byltyr ózara taýar aınalymy 2,5 mdrd dollarǵa jetip, koreı ınvestıtsııasynyń kólemi 7,5 mlrd dollardan asyp tústi.
Sondaı-aq, kezdesý aıasynda taraptar eki eldiń áleýetin neǵurlym tıimdi paıdalaný, iri tehnologııalyq jobalardy ilgeriletý jáne seriktestiktiń jańa modelin qalyptastyrýǵa ýaǵdalasty.
Buǵan qosa ıÝn Sok El men Shavkat Mırzıeev qaýipsizdik pen qorǵanys salasynda, onyń ishinde kıberqylmys, terrorızm jáne ekstremızmmen kúres salasynda tyǵyz baılanys ornatýǵa erekshe nazar aýdardy.
Bul kezdesýden soń taraptar keńeıtilgen quramda kelissóz júrgizdi. Onda ózbek-koreı qatynastaryn odan ári damytý jáne tereńdetý máseleleri jan-jaqty talqylandy.
«Ózbekstanǵa jasaǵan memlekettik saparyńyzdy bizdiń elmen jáne óńirmen kópjosparly yntymaqtastyqty damytýǵa zor kóńil bólýdiń taǵy bir jarqyn dáleli dep sanaımyz», - dedi Shavkat Mırzıeev.
Búgingi tańda Koreıanyń qatysýmen Ózbekstanda energetıka, hımııa, avtomobıl, elektrotehnıka, toqyma jáne basqa da salalarda 726 birlesken kásiporyn iske qosylǵan.
Kelissóz barysynda taraptar aldaǵy 3 jylǵa arnalǵan ózbek-koreı arnaıy strategııalyq seriktestiginiń joǵary tehnologııalarǵa negizdelgen jańa baǵytyn damytýdyń mańyzdylyǵyn atap ótti.
Shavkat Mırzıeev pen ıÝn Sok El arasynda ótken kezdesý qorytyndysy boıynsha prezıdentter birlesken málimdemege jáne ekijaqty 17 qujatqa qol qoıdy.
