Koreıa Prezıdentin Qazaqstanǵa saparmen kelýin kútemiz - Nazarbaev
ASTANA. QazAqparat - Ońtústik Koreıa Prezıdenti Mýn Dje Indi Qazaqstanǵa saparmen kelýin kútemiz. Búgin Aqordada birqatar shet memlekettiń Tótenshe jáne Ókiletti Elshisinen senim gramotasyn qabyldaǵan QR Prezıdenti Nursultan Nazarbaev osylaı dedi, dep habarlaıdy QazAqparat.
«Qazaqstan óz egemendiginiń alǵashqy kezeńinen bastap álem elderimen syndarly saıasat júrgizip keledi. Koreı Respýblıkasy bizdiń Azııadaǵy negizgi bir seriktesimiz bolyp tabylady. Men Seýlge byltyrǵy qarashadaǵy memlekettik saparymnyń nátıjesin joǵary baǵalaımyn. Qol jetkizilgen ýaǵdalastyqtar strategııalyq seriktestigimizdi nyǵaıta túsýge septigin tıgizedi dep senemin», - dedi Qazaqstan Prezıdenti.
Osy oraıda Memleket basshysy Koreıanyń jańadan saılanǵan prezıdentine joldaǵan quttyqtaýynda osy baǵdarlamany odan ary qaraı júrgizetiindigine senim bildirgenin jáne Qazaqstanǵa shaqyrǵanyn atap ótti.
«Qazaqstan ekonomıkasy úshin - Ońtústik Koreıa óńirdegi eń iri ınvestorlardyń biri bolyp sanalady. Qazaqstannyń dıplomatııasy ár ýaqytta Soltústik Koreıamen jaǵdaıdyń kelissózben sheshilýine septigin tıgizedi. Ol túbekte beıbitshilik ornaýyna biz tilektespiz. Ekijaqty yntymaqtastyq barlyq salada odan ary damytý joldaryn talqylaý úshin prezıdent Mýn Dje Indi Qazaqstanǵa saparmen kelýin kútemiz», - dedi Nursultan Nazarbaev.
Aıta keteıik, Memleket basshysyna Ońtústik Koreıa Elshisi Kım De Sık, Indonezııa Elshisi Rahmat Pramono, Rýmynııa Elshisi Chezar-Manole Armıaný, Serbııa Elshisi Vladan Matıch senim gramotasyn tabys etken bolatyn.
