Koreıa Prezıdenti: Seýl men Phenıan beıbitshilik pen birigýge qozǵalysty bastaı alady
ASTANA. QazAqparat - Koreıa Respýblıkasy men KHDR ótken aptada Phanmýndjomda ótken shıelenisti báseńdetý jónindegi kelissózder barysynda qol jetkizilgen ýaǵdalastyqtardy saqtaǵan jaǵdaıda beıbitshilik pen birigýge qaraı qozǵalysty bastaı alady. Bul týraly seısenbi kúni ońtústikkoreıalyq prezıdent Pak Kyn He málimdedi.
«Eger qıyndyqpen qol jetkizilgen ýaǵdalastyqtar oıdaǵydaı oryndalsa, Koreıa túbegindegi beıbitshilik pen birigý, yntymaqtastyq jaǵyna qaraı qozǵalysty bastaýǵa bolady», - dep atap kórsetti ol mınıstrler kabınetiniń otyrysynda. Koreıa Respýblıkasynyń kóshbasshysy eki el 1950-1953 jyldardaǵy soǵys ajyratqan otbasylardyń týystarymen kezdesýin oıdaǵydaı ótkize alatynyna úmitin bildirdi. Ony uıymdastyrýǵa qatysty kelissózder 7 qyrkúıekte, al kezdesýdiń ózi 27 qyrkúıekte, Koreıada egin merekesi jáne Chhýsok ata-babalaryn eske alý kúninde bolýy tıis, dep jazady TASS.
2009 jylǵy koreıaralyq tarıhı sammıtten keıin Phenıan men Seýl jarty ǵasyrdan astam ýaqyt boıy týystary men jaqyndaryn kórmegen týysqandardyń kezdesýin birneshe ret ótkizdi. Sońǵysy - 2014 jyldyń basynda ótti. Soltústik jáne Ońtústik Koreıaǵa bólingen turǵyndar bir-birine qonaqqa bara almaıdy, hat jazysa almaıdy, telefonmen sóılesýge de jáne Internet arqyly baılanysýǵa da múmkindik joq.
Ótken aptada ótken KHDR men Koreıa Respýblıkasynyń joǵary mártebeli ókilderiniń kelissózderinde taraptar «qysqa merzimniń ishinde Phenıanda nemese Seýlde koreıaralyq qatynastardy saýyqtyrý boıynsha ókimetter arasynda kelissózderdi ashý jáne budan bylaı birqatar salalar máseleleri boıynsha dıalog pen kelissózder júrgizý, sondaı-aq bólingen otbasylar músheleriniń, olardyń týystarymen kezdesýin uıymdastyrý jáne ony budan bylaı jalǵastyrý jóninde ýaǵdalasty. Soltústik jáne Ońtústik sondaı-aq ártúrli salalardaǵy azamattyq uıymdar arasynda almasýdy jandandyrýǵa ýáde berdi.
