Koreıa prezıdenti fotosýretshisiniń jumystary Qostanaıda qoıyldy
QOSTANAI. QazAqparat - Qostanaı oblystyq «Dostyq úıinde» «Qazaqstan káristeri» atty fotokórme ashyldy, dep habarlaıdy «QazAqparat» HAA tilshisi.
Bul shara koreılerdiń Qazaqstanda turyp jatqandaryna 80 jyl tolýyna, sondaı-aq, Koreıa men Qazaqstannyń arasynda dıplomatııalyq qarym-qatynas ornatylǵanyna 25 jyl tolýyna oraılastyryldy. Fotokórmede negizinen Koreı Respýblıkasy Prezıdenti fotosýretshisi Kım Djın Soktyń týyndylary qoıylǵan.
«Kım Djın Sok Qazaqstanǵa alǵash kelgende fotolar serııasyn jasaýdy uıǵarǵan. Sýretterde avtor 1937-shi jyly keńes saıasatynyń májbúrlep jer aýdarǵan kezde Qazaqstanǵa qonystanǵan káris ultynyń urpaqtarynyń qazirgi kúndelikti ómirin kórsetken. Qazaqstanda 100 myńǵa jýyq etnıkalyq káris turady. Bul kórsetkish Qazaqstanda ómir súrip jatqan 130 ult ókilderiniń 0,6 paıyzyn quraıdy. Qonys aýdarǵan kárister áýeli shaǵyn ǵana Úshtóbe aýylyna kóshirilgen», - dep málimdedi Qazaqstandaǵy koreı mádenı ortalyǵynyń dırektory Lı He-Ran.
Kım Djın Sok bizdiń elden bólek, Ispanııa, Frantsııa, Japonııa, Afrıka, Gımalaı jáne basqa memleketterge baryp, sýret serııasyn jınap otyrǵan. 10 jyldan astam ýaqyt fototilshi bolyp jumys istegen, sonymen qatar koreı ýnıversıtetterinde fotoóner boıynsha dáris bergen. Qazirgi tańda Kım Djın Sok Koreı Respýblıkasy Prezıdentiniń ákimshiliginde fotosýretshi bolyp qyzmet etedi.
