Koreıa Prezıdenti Toqaevqa general Hon Bom Donyń súıegin qaıtarǵany úshin alǵys aıtty
ASTANA. KAZINFORM — Koreıa Respýblıkasynyń Prezıdenti bes jyl buryn Koreıaǵa halyq qaharmany, general Hon Bom Donyń súıegin qaıtarýǵa kómekteskeni úshin Prezıdent Qasym-Jomart Toqaevqa alǵys aıtyp, koreı halqy bul izgi isti umytpaıtynyn ári joǵary baǵalaıtynyn jetkizdi. Bul týraly Aqordanyń baspasóz qyzmeti habarlady.
Lı Chje Meń eki eldiń syrtqy saıasattaǵy baǵdary uqsas ekenin málimdep, ekijaqty yntymaqtastyqty odan ári tereńdetýge beıil ekenin rastady.
– Koreıa Respýblıkasy men Qazaqstan syrtqy saıasattaǵy yntymaqtastyq aıasyn keńeıtip, ulttyq múdde men naqty nátıjege baǵdarlanǵan pragmatıkalyq dıplomatııa ustanady. Qazaqstan – bizdiń ekonomıkalyq qaýipsizdik salasyndaǵy mańyzdy seriktesimiz. Sizdiń elińiz tek energetıkalyq jáne tabıǵı resýrstarǵa ǵana baı emes, keleshegi zor joǵary tehnologııalyq salalarda da zor áleýetke ıe. Biz óndiriske arnalǵan ozyq tsıfrlyq tehnologııalarymyz arqyly Qazaqstan ónerkásibin jańǵyrtýǵa úles qosýǵa ázirmiz. Halyqaralyq ahýal bulyńǵyr kezeńde elderimiz kúsh-jiger men áleýetterin biriktirip, yntymaqtastyqty nyǵaıtýǵa tıis. Sondaı-aq ózara tıimdi negizde ekonomıkalyq ósimniń jańa múmkindikterin tabýy qajet, – dedi Koreıa Prezıdenti.
Eske sala keteıik Koreıa Qazaqstanda kóz jumǵan general batyrynyń súıegin eline alyp ketkeni týraly jazǵan edik.
Aıta ketelik Qazaqstan men Koreıa Respýblıkasynyń prezıdentteri shaǵyn quramda kelissóz júrgizgen edi.
