Koreıa men Ortalyq Azııa seriktestigi – álemdik damýdyń kepili
ASTANA. KAZINFORM – ІІ Astana Think Tank Forum-2025 halyqaralyq forýmynyń qatysýshysy, koreıalyq saıasattanýshy Chon Gýk Rı halyqaralyq yntymaqtastyqtyń ózegi retinde Ortalyq Azııanyń mańyzy artyp kele jatqanyn jetkizdi.
Astana qalasynda ótip jatqan ІІ Astana Think Tank Forum-2025 halyqaralyq forýmynyń «Birpolıarlyq dáýirdiń aıaqtalýy: Kúshter tepe-teńdiginiń ózgerýi jáne kópjaqtylyqtyń bolashaǵy» atty kezekti sessııasynda sóz sóılegen Ońtústik Koreıa Respýblıkasynyń ókili, Koreıa qory janyndaǵy Koreıa-Ortalyq Azııa yntymaqtastyq forýmy hatshylyǵynyń atqarýshy dırektory Chon Gýk Rı Koreıa men Ortalyq Azııa elderi arasyndaǵy kópjaqty yntymaqtastyqtyń mańyzy týraly baıandama jasap, taraptardyń yntymaqtastyǵy jańa beleske shyqqanyn atap ótti.
Sondaı-aq ol qazirgi kúrdeli halyqaralyq jaǵdaıda kópjaqty áriptestiktiń de róli kúsheıip otyrǵanyn jetkizdi.
– Búginde álem kóppolıarlyqtan keıingi jańa kezeńge aıaq basty. Mundaı jaǵdaıda halyqaralyq yntymaqtastyqtyń ózegi retinde Ortalyq Azııanyń mańyzy artyp keledi, – dedi spıker.
Koreıa men Ortalyq Azııa elderi arasyndaǵy dıplomatııalyq qatynastar 1992 jyly ornaǵanyn atap ótken ol sońǵy 30 jylda saıasat, ekonomıka jáne mádenıet salalaryndaǵy baılanystar turaqty túrde keńeıip kele jatqanyna toqtaldy.
– Eger 1990 jyldary ekijaqty saýda aınalymy nebári 200 mıllıon dollar bolsa, búginde bul kórsetkish shamamen 9 mıllıard dollarǵa jetken.
Koreıa men Ortalyq Azııa arasyndaǵy qarym-qatynastyń jańa kezeńi 2007 jyly bastaldy. Sol jyly eki tarap Koreıa – Ortalyq Azııa yntymaqtastyq forýmyn quryp, ózara is-qımyldy ınstıtýtsıonaldy deńgeıge kóterdi. Al 2017 jyly forým sheshimderin júıeli túrde iske asyrý úshin turaqty hatshylyq quryldy, – dedi ol.
Baıandamashynyń aıtýynsha, Koreıa men Ortalyq Azııa arasyndaǵy seriktestik aımaqtyń turaqtylyǵyn nyǵaıtyp qana qoımaı, jahandyq yntymaqtastyqty da ilgeriletýge yqpal etip otyr.
Eske sala ketsek, elordada ótip jatqan ІІ Astana Think Tank Forum-2025 halyqaralyq forýmynda Syrtqy ister mınıstriniń birinshi orynbasary Erjan Ashyqbaevtyń geosaıası teketirester álemdik ekonomıkaǵa aıtarlyqtaı zııanyn tıgizetinin aıtqanyn jazǵanbyz.