Koreıa men BAÁ 65 mlrd dollardan astam somaǵa birlesken jobalardy iske asyrmaq
ASTANA. KAZINFORM – Seýl men Ábý-Dabı arasynda kelisilgen bastamalardyń jalpy quny 65 mlrd dollardan asady jáne qorǵanys ónerkásibin, ınvestıtsııalar men ıadrolyq energetıkany qamtıdy, dep habarlaıdy Kazinform agenttiginiń menshikti tilshisi.
Ońtústik Koreıa men Birikken Arab Ámirlikteri 65 mlrd dollardan astam somaǵa birlesken jobalardy júzege asyrýǵa kelisti. Onyń ishinde 35 mlrd dollardan astamy qorǵanys ónerkásibi salasyna bólinbek. Taǵy 30 mlrd dollar ınvestıtsııalyq yntymaqtastyqqa tıesili.
Bul týraly beısenbi kúni Ońtústik Koreıa prezıdenti ákimshiliginiń basshysy ári strategııalyq ekonomıkalyq yntymaqtastyq jónindegi arnaıy ókil Kan Hýn Sık BAÁ-ge saparynyń qorytyndysyna oraı málimdedi. Onyń málimdemesin Yonhap agenttigi jarııalady.
Kelisimderge BAÁ prezıdenti Muhammed bın Zaıd ál-Nahaıanmen jáne Ábý-Dabıdiń Atqarýshy bılik isteri basqarmasynyń tóraǵasy Haldýn Halıf ál-Múbarakpen ótken kezdesýler barysynda qol jetkizildi.
Ońtústik Koreıa delegatsııasy ámirlikter tarapyna Koreıa Respýblıkasynyń prezıdenti Lı Chje Menniń jeke joldaýyn tabystady. Al kelissózder birneshe kezeńnen turatyn qarqyndy konsýltatsııalar formatynda ótti.
Qorǵanys baǵyty aıasynda taraptar qorǵanys ónerkásibi salasyndaǵy yntymaqtastyqtyń negizdik qurylymyn qurý týraly ózara túsinistik memorandýmyna qol qoıdy. Qujat birlesken jobalaý, kadr daıarlaý, tehnıkalarǵa qyzmet kórsetý jáne jańǵyrtý sharalaryn qosa alǵanda qarý-jaraq satyp alýdyń qarapaıym modelinen tolyq tsıkldi ózara is-qımylǵa kóshýdi kózdeıdi.
Kan Hýn Sıktiń aıtýynsha, yntymaqtastyq dástúrli «satyp alýshy – satýshy» modeliniń aıasynan shyǵyp otyr.
— Qorǵanys yntymaqtastyǵy ulttyq qaýipsizdik máselelerimen tikeleı baılanysty jáne elder arasyndaǵy joǵary deńgeıdegi senim bolǵan jaǵdaıda ǵana múmkin, — dep atap ótti ol.
Málimetterge qaraǵanda, qorǵanys jobalary biriktirilgen áýe qorǵanysy júıelerin, avıatsııalyq jáne áskerı-teńiz baǵyttaryn qamtıdy. Ońtústikkoreılik sheneýnik qaýipsizdik máselerine baılanysty jekelegen kelisimsharttardyń egjeı-tegjeıin jarııalanǵan joq.
Taraptar 30 mlrd dollar kólemindegi ekijaqty ınvestıtsııalyq negizdi qaıta iske qosýǵa ýaǵdalasty. Jańartylǵan tetik BAÁ-niń Ońtústik Koreıaǵa qatysty ınvestıtsııalyq mindettemelerin qoldaýǵa, sondaı-aq ońtústikkoreıalyq kompanııalardyń Taıaý Shyǵys pen úshinshi elderdiń naryǵyna shyǵýyna járdemdesýge baǵyttalǵan.
Yntymaqtastyq atom energetıkasy salasynda da keńeıedi. Taraptar BAÁ-degi «Baraka» atom elektr stantsııasy jobasyn iske asyrý tájirıbesine súıene otyryp, ıadrolyq tsıkldiń barlyq tizbegi boıynsha ózara is-qımyldy tereńdetýge nıetti. Sóz ıadrolyq otyn jetkizý, stantsııalarǵa qyzmet kórsetý quzyretterin nyǵaıtý, sonymen qatar nysandardy basqarýda jasandy ıntellekt tehnologııalaryn qoldaný máseleleri jaıynda bolyp otyr.
Haldýn Halıf ál-Múbarak naýryz-sáýir aılarynda munan arǵy qadamdardy talqyǵa salý úshin Seýlge barmaq. Investıtsııalyq kelisimniń keıbir egjeı-tegjeıin mamyrda jurtshylyqqa usyný josparlanǵan.
Qol jetkizilgen ýaǵdalastyq ótken jyldyń qarasha aıynda Ábý-Dabıde ótken eki el kóshbasshylarynyń sammıtiniń jalǵasy boldy. Ol kezde strategııalyq yntymaqtastyq baǵyttary retinde qorǵanys ónerkásibi, jasandy ıntellekt, atom energetıkasy jáne mádenıet salalary aıqyndalǵan edi.
Aıta keteıik, Ońtústik Koreıa ınvestıtsııalyq baspanasy bar azamattarǵa talapty kúsheıtpek.