Koreıa ǵalymdary qatty ystyq pen sýyqqa tótep beretin «sýpermetall» jasady

ASTANA. KAZINFORM – Ońtústik Koreıadaǵy Pohang ǵylym jáne tehnologııa ýnıversıtetiniń ǵalymdary materıaltaný salasynda úlken jetistikke qol jetkizdi, dep habarlaıdy Gazeta.ru. 

Atap aıtqanda, olar 196 gradýs Tselsııden 600 gradýs Tselsııge deıingi temperatýrada óz qasıetterin saqtaıtyn qorytpa oılap tapty. 

Jańa joǵary entropııalyq nıkel negizindegi qorytpa «gıperadapter» dep ataldy. Onyń basty ereksheligi – temperatýranyń kez kelgen ózgerisinde mehanıkalyq qasıetteriniń turaqtylyǵy. Bul buryn metall materıaldar úshin múmkin emes dep sanaldy.

Bul qasıetterdiń qupııasy – qorytpanyń boıyna birkelki taralǵan L1₂ nano ólshemdi bólshekter. Atalmysh mıkroskopııalyq elementter armatýra retinde áreket etedi jáne deformatsııany boldyrmaıdy. Sonymen qatar materıaldyń ishki qurylymy syrtqy jaǵdaılarǵa qaramastan júktemelerge beıimdele alady.

Bul ınnovatsııany temperatýranyń aıtarlyqtaı aýytqýy oryn alatyn aımaqtarda qoldanýǵa bolady. Áńgime ǵaryshtyq zymyrandar, reaktıvti qozǵaltqyshtar, avtomobıldiń gaz shyǵarý júıeleri, qýat týrbınalary jáne ónerkásiptik qubyrlar týraly bolyp jatyr.

Eske sala keteıik, Ońtústik Koreıa Qazaqstanmen birlesken zertteý ınstıtýtyn qurýǵa 16 mln dollar bóletini jaıly jazǵan edik.