Koreıa elshiligi Úshtóbede áleýmettik osal úılerge gaz jabdyǵyn ornatty
ASTANA. KAZINFORM – Jetisý oblysynyń Úshtóbe qalasynda áleýmettik osal otbasylarǵa qysta turǵyn úılerin jylytýǵa qajetti jabdyqtar berildi. Igi bastama Qazaqstandaǵy káristerdiń qonystanǵanyna 90 jyl tolýyna oraı júzege asyrylyp otyr.
Joba aıasynda Úshtóbedegi áleýmettik osal jáne az qamtylǵan otbasylardyń turǵyn úı jaǵdaıyn jaqsartý kózdelgen. Atap aıtqanda, úılerdi gaz jelisine qosý, gaz qazandyqtary men energııa únemdeıtin jylý jabdyqtaryn ornatty.
Byltyr dál osyndaı kómek 25 otbasyǵa kórsetilse, bıyl qoldaý alatyn otbasylardyń sany 50-ge deıin artty. Olardyń qatarynda koreı otbasylarymen birge Úshtóbede turatyn ózge de áleýmettik osal januıalar bar.
Úshtóbe – Qazaqstan káristeriniń tarıhyndaǵy mańyzdy meken
Úshtóbe – 1937 jyly Keńes Odaǵynyń Qıyr Shyǵysynan kúshtep kóshirilgen káristerdiń alǵash qonystanǵan mańyzdy mekenderdiń biri. Tarıhı derekterge sáıkes, jer aýdarylǵan kárister jańa jerde óte qıyn jaǵdaıda ómir súrdi. Alǵashqy jyldary olar jer úıler men jertólelerge uqsas baspanalar turǵyzyp, qystyń qatań sýyǵyna tótep berýge májbúr bolǵan.
Qazir de qaladaǵy keıbir eski úıler kómir jaǵyp otyr. Bul turǵyndarǵa qys mezgilinde qosymsha qıyndyq týǵyzyp, otyn shyǵynyn arttyrady.
– Biz búgin jaı ǵana gaz qubyrlary men qazandyqtardy tabystap otyrǵan joqpyz. Bul – Úshtóbe turǵyndaryna, sonyń ishinde Qazaqstan káristerine qys mezgilin jyly ári qaýipsiz jaǵdaıda ótkizýge degen qoldaýymyz ben qamqorlyǵymyzdyń kórinisi, – dedi Koreıa Respýblıkasynyń Qazaqstandaǵy Elshisi Chjon Kıhon.
Onyń aıtýynsha, Koreıa elshiligi áleýmettik jaýapkershilik baǵytyndaǵy jobalar arqyly koreıalyq kompanııalar men Qazaqstandaǵy jergilikti qaýymdastyqtar arasyndaǵy baılanysty odan ári nyǵaıtýǵa nıetti.
Ońtústik Koreıada qurylǵan Good Neighbors qaıyrymdylyq uıymynyń ókilderi men koreıalyq kompanııalardyń qyzmetkerleri kómek alǵan otbasylarǵa estelik taqtaısha men turmystyq zattardy tapsyrdy. Budan keıin delegatsııa kómek kórsetilgen otbasylardyń úılerine baryp, ornatylǵan jabdyqtarmen jáne turǵyndardyń turmys jaǵdaıymen tanysty.
Qaratal aýdany men Good Neighbors memorandýmǵa qol qoıdy
Іs-shara aıasynda Good Neighbors uıymy men Qaratal aýdany arasynda áleýmettik jaýapkershilik salasyndaǵy yntymaqtastyqty nyǵaıtýǵa baǵyttalǵan ózara túsinistik týraly memorandýmǵa qol qoıyldy. Bul qujat aldaǵy jobalardy iske asyrýǵa negiz bolady.
Taraptar áleýmettik bastamalardy júzege asyrýda jergilikti atqarýshy organdardyń, koreıalyq kompanııalar men uıymdardyń resýrstary men múmkindikterin biriktirýdi josparlap otyr.
Elshi Chjon Kıhon bul bastama bir rettik kómekpen shektelmeı, jergilikti qaýymdastyqpen ózara is-qımyldyń turaqty úlgisine aınalatynyna úmit bildirdi.
– Elshilik aldaǵy ýaqytta da koreıalyq kompanııalar men uıymdardyń áleýmettik jobalaryn qoldap, Qazaqstandaǵy jergilikti qaýymdastyqtarmen baılanysty nyǵaıtýǵa jáne eki el halqy arasyndaǵy dostyq pen yntymaqtastyqty damytýǵa kúsh salady, – dedi dıplomat.
Koreıalyq delegatsııa Úshtóbedegi tarıhı oryndardy aralady
Іs-sharadan keıin Koreıa Respýblıkasynyń Elshisi bastaǵan delegatsııa Úshtóbe temirjol stantsııasyna bardy. Bul stantsııa 1937 jyly kúshtep kóshirilgen káristerdiń alǵash kelgen oryndarynyń biri retinde tarıhta qaldy.
Sondaı-aq delegatsııa Qazaq-koreı dostyǵy saıabaǵyn jáne Qarataldaǵy káristerdiń tarıhı keshenin aralady.
Tarıhı keshende káristerdiń Qazaqstanǵa kúshtep qonys aýdarýy, alǵashqy jyldardaǵy turmysy týraly materıaldar qoıylǵan. Munda sol kezeńdegi jer úıler men dástúrli koreı baspanalary, sonyń ishinde «ondol» dep atalatyn dástúrli jylytý júıesi de kórsetilgen.
Bul oryndar Qazaqstandaǵy káristerdiń tarıhyn eske alyp qana qoımaı, eki el halqy arasyndaǵy tarıhı jáne adamı baılanystyń mańyzyn aıshyqtaıdy.
2027 jyly káristerdiń Úshtóbege qonystanǵanyna 90 jyl tolady. Osyǵan oraı Koreıa Respýblıkasynyń Qazaqstandaǵy Elshiligi aldaǵy ýaqytta da koreı qaýymdastyǵymen jáne jergilikti qoǵamdastyqtarmen yntymaqtastyqty jalǵastyryp, áleýmettik jobalardy júzege asyrýdy josparlap otyr.
Eske sala ketsek, 14 qyrkúıekte Memleket basshysy Qasym-Jomart Toqaev Koreıa Respýblıkasynyń Prezıdenti Lı Chje Mennyń shaqyrýymen Seýlge memlekettik sapar jasady. Sapar barysynda qazaq-koreı strategııalyq seriktestiginiń mán-jaıy talqylanyp, Koreıanyń iri kompanııalary jetekshilerimen kezdesý ótti.
