Koreıa elshisi káris ultynyń dástúrli úılený toıyna qazaq shapanymen keldi
ASTANA. QazAqparat - Astanada ońtústikkoreıalyq ártister koreılerdiń dástúrli úılený toıyn kórsetti, dep habarlaıdy Qazaqparat tilshisi.
Oǵan sebep Astanadaǵy Ońtústik Koreıa elshiligi qyzmetkeriniń turmys qurýy. Onyń dástúrli úılený rásimi týraly usynysyn kúıeýi qýana qoldaǵan.
Mundaı áserli rásimdi uıymdastyrýǵa Ońtústik Koreıanyń Tegý qalasynda ornalasqan "Dosan" dástúrli koreı etıketi ortalyǵy kómektesken.
Koreı halqynda neke - jańa ómirdiń bastaýy bolyp sanalady jáne oǵan asqan jaýapkershilikpen qaraıdy.
Uzaq ári mándi ǵumyr súrsin degen nıetpen toı dastarhanyna taýyq pen átesh qoıady. Talshyn men qurma - muragerdiń aqyldy ıa tárbıeli bolyp ósýine úmitti bildiredi. Sondaı-aq, ústelde uzaq jubaılyq ǵumyrdy bildiretin kópjyldyq ósimdik turýy tıis. Tazalyq pen adaldyqtyń belgisi retinde bambýk qoıylady. Kúrish - amandyq pen yrys-nesibeni bildiredi. Bata retinde balaýyz sham jaǵylady.
Barlyq qonaqtar toıǵa koreıdiń ulttyq kıimi - hanbokty kıip keldi. Tek Qazaqstandaǵy Ońtústik Koreıa elshisi Kım De Sık pen onyń áıeli qazaqtyń ulttyq kıimimen keldi.
"Maǵan qazaq mádenıeti unaıdy. Qazaq pen koreı mádenıeti qatty uqsaıdy. Meniń búgingi kıimim - qazaq mádenıetine degen alǵys pen qurmetimdi bildiredi", - dedi elshi jýrnalısterge bergen suhbatynda.
"Jaqynda Májilis depýtaty Roman Kım maǵan qamshy syılady. Únemi kósh aldynda júrýimdi, Qazaq-Koreı dostyǵyn nyǵaıta berýimdi tiledi. Qamshy kóshbasshylyq qasıetti bildiredi eken. Men úshin bul syılyq óte qundy. Odan bólek, úıimde Aısha bıbi kesenesiniń úlgisi bar. Kelgen qonaqtarymnyń barlyǵyna qazaqtyń Romeo men Djýlettasy týraly áserli de qaıǵyly oqıǵasyn aıtyp beremin", - dedi elshi.
