Koreıa elshisi astanalyqtarǵa óleń oqyp berdi
«Men Qazaqstannyń astanasynda osyndaı keremet «Dostyq baqshasynyń» ashylǵanyna qýanyp turmyn. «EKSPO-2017» halyqaralyq kórmesi sátti aıaqtalǵan tusta eki eldiń yntymaǵynyń bekip kele jatqany odan ary qýanta túsedi. Koreıanyń osynaý keremet baqshasy qazaq halqyna degen qurmet pen dostyq negizinde salynyp otyr. Bıylǵy jyly 25 jyl tolyp otyrǵan eki jaqty qarym-qatynas az ýaqytqa qaramastan kúsheıe tústi. Koreıalyqtar úshin Qazaqstan iri seriktesterdiń biri. Bul elde de Koreıaǵa degen qurmettiń zor ekenin bilemiz», - deıdi Koreıa elshisi.
Kım De Sıktiń aıtýynsha, 3 jyl buryn eki eldiń basshylary kelisimge kelip, atalǵan joba 2 jyldyń ishinde júzege asyrǵan.
«EKSPO kórmesiniń arqasynda eki eldiń baılanysy nyǵaıa tústi. Koreıa pavılony eń tanymal oryndardyń biri boldy. Biz 250-ge jýyq mádenı shara ótkizdik. Seriktestiktiń áleýeti sheksiz. Biz Astana halqyna osy baqshany tartý etemiz. Eki eldiń dostyǵynyń sımvoly bolǵandyqtan, baqshaǵa bappen qaraýlaryńyzdy ótinemin. Ózim poezııaǵa jaqyn bolǵandyqtan, sózimdi óleńmen aıaqtaýǵa ruqsat etińizder», - dedi Kım De Sık.
Koreıa elshisiniń óz tilindegi óleńi kópshiliktiń qoshemetine ıe boldy. Óleń sózbe-sóz aýdarylmasa da, aýdarmashynyń sózine qulaq assaq elshi astanalyqtarǵa ««Dostyq baqshasy» eki eldiń dostyǵyn nyǵaıtady, tórt mezgilde de osynda kelip meıman bolyńyz, tabıǵattyń kórkem kórinisin baqshaǵa kelip tamashalańyz» degen mándegi óleńdi arnaǵan.
Eske sala ketsek, búgin Astanadaǵy «Araı» saıabaǵynyń ishinde «Qazaqstan men Koreıa dostyq baqshasy» ashyldy. «Koreıa baqshasynyń» qurylysyna shamamen 9 aı ýaqyt ketken. Demalýǵa arnalǵan oryndy salý úshin Ońtústik Koreıadan qurylys materıaldary ákelinip, saıabaqqa sol elde ósetin aǵashtar otyrǵyzylǵan.
