Koreıa Elshiligi janynda 50-den astam qazaqstandyq volonter bolyp júr
Atalǵan sharalar Koreıa men Qazaqstan arasyndaǵy dıplomatııalyq qarym-qatynastyń 30 jyldyǵy aıasynda ótýde.
«Friends of Korea» uıymy 2019 jyly qarashada Qazaqstan Respýblıkasyndaǵy Koreıa Respýblıkasynyń Elshiligi janynan qurylǵan. Bul volonterlik uıym Koreıa mádenıetine qyzyǵýshylyq tanytqan adamdardy tanystyrý jáne tyǵyz ózara qarym-qatynas ornatý, sondaı-aq birlesken is-sharalar ótkizý úshin qurylǵan.
Saltanatty sharaǵa Nur-Sultan, Pavlodar jáne Almatydan kelgen volonterlik uıymdardyń músheleri jınaldy. Qazaqstan boıynsha bul uıymdarda 50-den astam jastar erikti qyzmet etedi. Sonymen qatar Koreıa halyqaralyq yntymaqtastyq agenttiginiń (KOICA) qazaqstandyq halyqaralyq stýdentter qaýymdastyǵynyń músheleri jáne Nur-Sultannyń túrli ýnıversıtetteriniń koreı klýbtarynyń stýdentteri qatysty. Qatysýshylar oıyn arqyly sóılesip, koreı taǵamdaryn ázirledi.
«2022 – 2023 Friends of Korea» qyzmeti Koreıa mádenıetimen tyǵyz baılanysty, olar 2023 jyldyń sońyna deıin Koreıa elshiligi uıymdastyrǵan túrli is-sharalarǵa qatysady. Sondaı-aq «2022 – 2023 Friends of Korea» jarııa dıplomatııa, mádenıet, bilim berý jáne qoǵammen baılanys salasyndaǵy erikti qyzmet arqyly Koreıa men Qazaqstan qatynastaryn nyǵaıtýǵa úles qosýdy josparlap otyr.
Koreıanyń Qazaqstandaǵy Tótenshe jáne ókiletti elshisi Ký Hong-sok óziniń quttyqtaý sózinde 1992 jyly eki el dıplomatııalyq qarym-qatynas ornatqanyn, sodan beri strategııalyq seriktester jáne naǵyz dostarǵa aınalyp, túrli salalardaǵy yntymaqtastyqtyń tamasha nátıjelerine qol jetkizgenin atap ótti. Odan ári elshi Ký Hong-sok «Friends of Korea» Koreıa men Qazaqstan qarym-qatynastarynyń damýyna úlken úles qosady degen úmitin bildirdi.
