Koreıa elshiligi ana men bala úıine turmystyq tehnıka syılady

NUR-SULTAN. QazAqparat – Koreıanyń qurylǵan kúni qurmetinde Qazaqstandaǵy Koreıa Respýblıkasynyń Elshiligi «Friends of Korea» stýdenttik klýbtar qaýymdastyǵymen birlesip «Qorǵaý» qoryna kómektesti, dep habarlaıdy QazAqparat.

Shara aıasynda Koreıa Respýblıkasynyń Qazaqstan Respýblıkasyndaǵy Tótenshe jáne Ókiletti Elshisi Ký Hong-sok jáne «Friends of Korea» toby «Qorǵaý» qoryna jalpy somasy 3 500 AQSh dollary bolatyn turmystyq tehnıka tartý etti.

Elshi Ký Hong-sok «Qorǵaý» qorynyń jetekshisi Anna Rylge 10 jyl boıy qıyn jaǵdaıǵa tap bolǵan áıelder men balalarǵa arnalǵan baspanany basqarýdaǵy tabandy eńbegi úshin rızashylyǵyn bildirdi.

«Qazaqstan men Koreıa – jaqyn dos memleketter, qos el bir-birin qoldaı otyryp, pandemııanyń osy uzaqqa sozylǵan qıyn kezeńin eńserip keledi. Qazaqstan Respýblıkasynyń Prezıdenti Qasym-Jomart Toqaevtyń tamyz aıynda Koreıaǵa jasaǵan memlekettik saparynan keıin eki el arasyndaǵy dostyq qatynastar odan ári nyǵaıa tústi. Koreı halqynyń jan jylýy osy baspananyń barlyq turǵyndaryna berilip, aldaǵy qysta jylý syılaıdy dep úmittenemin», - dedi elshi.

«Búgingi kómek úshin úlken alǵys aıtamyz. Sizder bergen turmystyq tehnıka – bizdiń baspana úshin eń qajet nárse. Sondaı-aq, sizder bergen tigin mashınasy en pesh te munda turatyn áıelderge aqsha tabýǵa múmkindik beredi», - dedi Anna Ryl.

«Stýdentter atynan osy sharany uıymdastyrǵany úshin elshilikke alǵys bildirgimiz keledi. Bul qaıyrymdylyq sharasy óte mańyzdy, óıtkeni pandemııa búkil álemdi sharpyǵan qıyn ýaqytta adamdar kómek qolyn sozyp, bir-birine kómektesýi kerek. Osyndaı sharalar eki el arasyndaǵy ózara baılanysty ornatýǵa, dostyq qarym-qatynastardy damytýǵa yqpal etedi», - dedi «Friends of Korea» tobynyń ókili Ádııa Ábdirahmanova.